Shillong, Jylliew 18: Ka Voice of the People Party (VPP) ka la mudui da ka ejahar pyrshah ïa u u Rakkam A Sangma uba dei u Myntri Sorkar na ka NPP kaba ïalam ia ka sorkar Meghalaya Democratic Alliance halor ka jingkynnoh ba u la kren ki kyntien pynshit ne isih jaitbynriew ha ka por ba u la ïalap ïa ka ilekshon Lok Sabha.
Ïa kane ka ejahar la ujor da u Finance Secretary ka VPP Bah Danny Langstieh ha kaba la aiti sha u Superintendent of Police (SP), ka East Khasi Hills District ha ka sngi Baar.
U Bah Langstieh u la kynnoh ba ha shwa ka jingpynlong ïa ka elekshon Lok Sabha, 2024, ka la don ka video clip kaba la saphriang ha kaba la ïohi bad ïohsngew ba u Myntri ha ka por ba u kren ha ki jingialang ialap elekshon u la pynmih ïa ki kyntien ba la kynnoh beit pyrshah ïa ka VPP bad kane ka jingkynnoh ka long ba kane ka party kan pynjot, pynïap, kan ñion bad pynjah noh ïa kawei ka jaitbynriew bad kane ka long kaba bakla jur, ka bym shisha bad ka bym dei.
“Haba kren ïa kum kine ki bym don jingkitkhlieh, ba pynshit bad isih ym tang ba kadei kaba bakla bad kaba beaiñ hynrei ka long ruh kaba ma namarba kan ïalam sha ka jingbym shongsuk shongshngaiñ bad ka ban lam sha ka jingïashrut jaitbynriew, bad jingïaumsnam,” la pynpaw ka VPP ha ka ejahar.
Haba phai sha ka jingbishar ka Supreme Court of India haba ïadei bad ki kyntien wanrah jingisih, u Bah Langstieh u la ong, “ha ka hukum kaba dangshen halor ka mukotduma jong Ashwini Kumar Upadhyay vrs Union of India & Ors, ka Supreme Court ka la pynpaw ba lada ka don kano kano ka jingkren isih ha kano kano ka jaka bad kano kano ka jingleh ka ban lam sha ka jingpynkheiñ ïa ki kyndon 153A, 153B bad 295A bad 505 jong ka IPC etc, dei ban shim kam suo motu ban register case watla kam shym la don ka jingmudui hynrei ka jingshim kam katkum ka aiñ kan ïaid.”
“Hynrei watla kam don ka jingshim kam na phi ïa ka tarik ba la pynmih ïa kane ka kyntien isih, ma nga kum u nongshong shnong ba don jingkitkhlieh bad u dkhot ka VPP nga kyrpad jur ïa phi ban leh ïa kaba donkam pyrshah ïa u Myntri Sorkar bad nga kwah ban kdew ba ha kajuh ka Case, ka Supreme Court ka la pynkut ba lada ka don kano kano ka jingbym leh eiei katkum ba la bthah, yn kheiñ kum ka jingkheiñ dewthala (contempt of Court) bad yn shimkam kylla pyrshah ïa ki Ophisar kiba leh bym suitñiew ia kane ka kam,” u la bynrap.
U nongïalam ka VPP u la ong ba ka long ka sakhi ba ka jingkren ba la kren da u Myntri Myntri ki long kaba pynshit bad kiba aiding ban kyntiew, pynshlur, bad ka jingïasih hapdeng ki kynhun riewlum bad ki jaitbynriew hapoh ka jylla Meghalaya bad ka jingbym shonghok ban pynneh ïa ka jingsngew shipara hapdeng ki kynhun bapher bapher bad kan ktah ïa ka jinglong bajai jai jong ki paidbah.
“Namarkata, nga kwah ban wanrah ïa ka jingshimkhia jong phi halor kine ki jingkren ba pynshit, ban kyntu ïaphi ban shim da ka kam kaba tyngeh, bad ba uba pynkheiñ u dei ban shah pynshitom katkum ki kyndon hapoh ka 153A, 153B bad 505 jong ka IPC bad kiwei pat ki kyndon kiba don jingïadei bad ka aiñ,” la dawa ka VPP.
U Rakkam A Sangma, u dei u Myntri ka Sorkar Jylla uba khmih ïa ka tnat Pule Puthi, ka Border Areas Development Department bad ka General Administration Department, ha ka lah sngi u Blei u la kyntait ba u la kren ïa ki kyntien pynshit jaitbynriew ha ki rynsan ialap ilekshon ha rilum Garo.
