Shillong, Jylliew, 07: U Bah Joannes JTL Lamare uba dei u nongtrei mon sngewbha na ka shnong Kynton-U-Mon, Nongkem, East Khasi Hills District ha ka sngi Thohdieng u la mudui da ka ejahar sha u Superintendent of Police jong ka East Khasi Hills District pyrshah ïa ki lad pathai khubor na ri thor ïa kiba la tip kyrteng kum ka News18 MP Chhattisgarh bad ka Times of India halor ka jingkynnoh ba ki pynbudnam sniew ïa ka jylla Meghalaya.
Kine ki jingkynthoh ba pynbudnam sniew ïa ka Meghalaya ka long halor ka jingïap jong u Raja Raghuvanshi bad ka jingjahrngai haduh mynta ka kurim jong u ka Sonam Raghuvanshi, ki shi kurim kiba leit kai honeymoon sha Sohra.
Ha ka ejahar u Bah Lamare u la ong ba kum u nongshong shnong jong ka jylla Meghalaya bad kum u nongtrei uba ju kren ban ïada ïa ka hok longbriew manbriew um lah ban shu sngap ïa ka jingpynbudnam sniew da ki katto katne ki lad pathai khubor na rithor.
U la ai ruh ïa ka Link katkum ba la pynmih ha ka lad pathai khubor News18 MP Chhattisgarh kaba la kynnoh ruh ba ki Pulit ki donkti sopsop bad ka kynhun runar.
Ha kane ka ejahar u Bah Lamare u la kynnoh ba ka lad pathai khubor Times of India ka la pynbudnam sniew ïa ka jylla Meghalaya da kaba thoh ba ki jaka lum jong ka jylla Meghalaya ki dei ki jaka kiba ju jia bha ki kam runar ruser lane “Crime Prone Hills”.
U la pynpaw ruh ba ki paidbah ka jylla Meghalaya ki dei kiba ieit ïa ka jingsuk, kiba ïajan bad kiba sbun mynsiem, hynrei ki don ki katto katne ki lad pathai khubor kiba la pynbudnam ïa ki paidbah ka Meghalaya kum ki “Gang” kaba long ka mat kaba sngewkhia bha. Da ka dohnud kaba khia, hadien ba ngi la ïohsngew ïa ki jingkynnoh bym don nongrim bad ki jingkynnoh sniew ïa kiba la kynnoh pyrshah ïa ki paidbah ka jylla Meghalaya da ki lad pathai khubor, ka la dei ka por ba ngin ieng pyrshah ïa kine ki jingkynoh bym don nongrim.
U la ong shuh shuh ba ïa ki lad pathai khubor la tip kum ki païa basaw jong ka synshar paidbah bad la khmihlynti ba kin pathai ïa ki jingtip kiba shisha bad ban tih bniah ïa ki jingshisha ym ban shu mutdur ïa ki jingjia khlem da pynthikna ïa ki jingshisha bad ki jingtip kiba bniah.
Nalor kine ki lad pathai khubor u Bah Lamare u la ujor ruh pyrshah ïa kawei ka Comment ba la thep ha ka Facebook Page ba la ai kyrteng Shynrang Kynthei ka Juk Mynta ïa kaba la kynthoh ba kynshoit bad pynshit jaidbyniew da uwei u bar jylla uba la tip kyrteng kum u Rajdeep Malakar.
Shuh shuh u la ong ba ka jingpynsaphriang ïa kine ki khubor lamler kan buh jingma ïa ka jingim jong ki paidbah ka jylla Meghalaya kiba sah shabar ka jylla.
 | ReplyForwardAdd reaction |
