Shillong, K’lyngkot 14: Ka Hynñiewtrep Youths Council (HYC) Sohiong Circle ka la kynnoh ba ka tnat Pulit kam shym la shim khia ban kem ïa ki nongdawa pisa bymhok na ki trai jaka kiba ïoh ïa ka bailutksan na ka ophis jong ka Deputy Commissioner ha kaba ïadei bad ka jingshna pynheh ïa ka surok Two Lane Western Bypass.
Ka Ministry of Road Transports and Highways (MoRTH) ka la mang pisa T. 2205 klur ban shna ïa ka surok Western Bypass kaba jrong 38.256 kilomitar ban weng ïa ka jingdheng kali ha nongbah Shillong.
Ha ka jingïakren bad ki lad pathai khubor ha ka sngi Baar, u President jong ka seng u Bah Purningstar Shabong u la ong, “kim (Pulit) pat kem haduh mynta ruh namar katkum ka jingkren jong uwei u Rangbah Shnong ka la don ka jingbyrngem wat ban shim ïa ka jingim ruh.”
U la ïathuh ba ki briew kiba shong basah ha ki shnong kiba ka ïaid ka surok Western Bypass ki duna bha ban mih shakhmat ban pynshlur ïa kane ka jingshim pisa. “Ngi ai khublei ïa kito ki longkmie kiba shlur kiba la mih shakhmat ban pynpaw ïa kane. Lymda dei na ka jingmih jong kine ki longkmie shakhmat, ka jingïashim pisa kam paw eiei sha ka pyrthei. Hyrnei da ka jingdon jong ki, ka la pynpaw pyrthei ïa u Bah Rojen Khyllai bad ïa u Phridensing Thabah kiba don bynta ha kane ka kam,” ong u Bah Shabong.
Ha ka ujor sha u Secretary jong ka Ministry of Road Transports and Highways (MoRTH) u V. Umashankar ha ka 10 tarik mynta u bnai, ka seng ka la pynpaw ba ka Kong Klian Khyllait, kaba sah ha Jabar, East Khasi Hills District ha ka 31 tarik, Jymmang, 2024 ka la ïoh pdiang ïa ka pisa T.1,73,54,877 klur bad T. 1, 73,82, 129 klur na ka ophis jong ka Deputy Commissioner, East Khasi Hills District kum ka bai lutksan. Ka HYC ka la kynnoh ba u Bah Phridensing Thabah ha ka 3 tarik, Jylliew 2024 u la sei ïa ka pisa na ka Account jong ka Kong Klian Khyllait haduh T.73, 95149 lak bad T.21,03,219 lak kaba kot baroh T.94,98,368 lak da ka Cheque Number 7239 bad 7240 khlem ka jingtip bad ka jingmynjur jong ka.
Ka seng ha ka ujor, ka la kynnoh ruh ba ka Kong Ïaidrit Kharthangmaw kaba sah ha ka shnong Jabar Nengnong, East Khasi Hils ha ka 31 tarik, Jymmang, 2024 ka la ïoh pdiang ïa ka pisa T.13,20,937 lak na ka ophis jong ka Deputy Commissioner, East Khasi Hills District kum ka bai lutksan. “Hynrei u Bah Rojen Khyllait ha ka 5 tarik, Jylliew, 2024 u la sei ïa ka pisa na ka Account jong ka haduh T.2,47,125 lak lyngba ka Cheque number 17643 khlem ka jingtip bad ka jingmynjur jong ka,” la kynnoh ka HYC.
Sa ka Kong Bitinonra Kharthangmaw kaba sah ha ka shnong Jabar Nongneng, East Khasi Hills ha ka 19 tarik, Lber, 2024 ka la ïoh pdiang ïa ka bailutksan na ka ophis jong ka Deputy Commissioner kaba kot T. 20,82,441 lak bad T.15,04,800 lak. “Hynrei u Bah Rojen Khyllait ha ka 2 tarik, Ïaiong, 2024 u la sei ïa ka pisa na ka Account jong ka haduh T. 3,58, 724 lak lyngba ka CTS 000013153 khlem ka jingtip bad ka jingmynjur jong ka.
U President ka HYC u la pynpaw ka jingsngewkhia halor ka jingbym pat shim ïa ki sienjam batyngeh da ka tnat Pulit bad ki bor sorkar pyrshah ïa u Bah Rojen bad ïa u Bah Phridensing.
“Ka jingsngewkhia jong ngi ïa kine ki nongshim pisa ka long namarba wat ïa ka laiñ (jong ka surok) la pynkynriah na kawei ka jaka sha kawei ka jaka,” ong u Bah Shabong bad bynrap, “don ki trai khyndew ki bym ai pisa 10 percent shajrong la pynkynriah noh wat ïa ka laiñ (jong ka surok). Ngi ïoh jingtip ruh haduh mynta ba ka jingkyllaiñ jong ka surok Western Bypass ka long ka bym ïahap shuh ban shna ïa ki surokbah.”
U la ïathuh ba ka seng ka dang ap ïa ka jubab na ka Ministry ba kan ai jubab shwa ba ka seng kan shim da kiwei pat ki sienjam nangne shakhmat halor kane ka jingujor.
Haba kylli, ula ong, ‘ba ïa ka jingujor ka seng ka la ai kopi ruh sha u Chief Engineer jong ka NHIDCL.”
“Ngi kwah ban pynduhjait ïa ka bamsap bad ngi khmihlynti ba ka Sorkar kan pynshitom ïa u Phridensing bad u Rojen. Lada ki Engineer jong ka NHIDCL kim ïadon bynta hangne bad lada ki long laitluid kin ym shah khyrwait shabi ha u Phridensing. Ka jingshah khyrwait shabi jong ki Engineer (ka NHIDCL) kum ki si samkhmut ka pynpaw shai ba ki don bynta lang ha kane ka kam. Lymda dei ba ki don bynta lang, kumno ki lah ban pynkynriah ïa ka laiñ (jong ka surok),” la kynthoh u Bah President ka HYC.
U la dawa ruh ïa ka ophis jong ka Deputy Commissioner East Khasi Hills District ban pynlong ïa ka jingtohkit kaba bniah halor ka jingkynnoh jong u Rojen Khyllait bad u Bah Phridensing Thabah bad lada ka jingkynnoh jong kine ki arngut ka long tang ka jingkynnoh bymdei, ka DC ka dei ban ujor mardor da ka ejahar pyrshah ïa kine ki arngut.
U President ka HYC Nongthliew Circle u la kam ruh ba ula shah byrngem ha ki briew da kaba ïathuh, “lada u Jop u sei ïa kane ka ishu wat ka jingim jong u ruh ka don jingma. Kata ka dei tang ka jingpyntieng. Lada phi kwah ban ïatakhuh markhmat ruh kam leilei bad lada phi ïatakhuh ha Kashari ruh kam leilei namarba ngi shim ïa ki lad ki lynti ban pyllait ïa ka ri bad ka jaidbynriew na ka bamsap ka bampong.”
“Nga kyntu ïa ki trai jaka kiba shah shim kabu ha ki arngut (Phridensing Thabah bad Rojen Khyllait) ba kin mih shakhmat khnang ba ka jingujor kan long kaba khlaiñ.
