Shillong, Jylliew 20: U MP ba marwei ka seng NPP uba mihkhmat sha Rajya Sabha u Dr WR Kharlukhi ha ka sngi Palei u la ujor pyrshah ïa u YouTuber uba la kynnoh bamsap halor ka jingpyntreikam ïa ka Members of Parliament Local Area Development Scheme (MPLADS).
Haba kren sha ki lad pathai khubor, u Bah Kharlukhi u la ong ba u long uba kloi ban pdiang ïa kino kino ki jingtohkit bad un iehnoh ruh ïa ka kam MP lada lap ïa kano kano ka kam bamsap ba la shem ha kaba pyntreikam ïa ka MP skhim ka jong u.
“Nga ujor bad ka cyber crime police station pyrshah ïa u YouTuber ‘RS Kharbani’ halor ka jingkynnoh ba nga la bamsap bad ba ka don ka jingbam sap ha kaba pyntreikam ïa ka skhim MP,” u la ong.
“Lada mano mano ki don ki sakhi bad lada mano mano ki wan bad kin leit ai sha ki lad pathai khubor ba nga la shim ïa ka pisa, nga dalade ngan thoh sha ka sorkar bad ban pan da ka jingtohkit CBI bad nga kloi ruh ban leit sha Along, phi lah ban leit sha ki shnong, lada ki ong ba lada kane ka kam kaba khlem pyndep da maki, lane kiba la pyntrei da ki briew jong u Dr Kharlukhi, bad ngan iehnoh hi ha kane ka sngi kum u MP,” ong u MP da kaba ai ruh ka jingmaham ba un pan da ka bai mynraiñ khmat pyrshah ïa ka jingpyrshang da mano mano ban pynjah burom ïa u.
“Nga long uba shai bad nga don 3 tylli ki bank account. Nga long uba kloi ïa kano kano ka jingshah khynra da kano kano ka aiñ ne ka law enforcement agency,” u la bynrap.
U Kharlukhi u la ong ba kane ka jingkynnoh ka la wan ruh ha ka por ba u la jan shong thait na ka kam saiñ pyrthei. “Nga lah jan dap 40 snem ha ki kam saiñ pyrthei bad ngan sa shongthait noh shen bad kum kine ki mih kumta nga sngewdei ban pynshai namar nga long uba kloi ïa kano kano ka jingtohkit ha kano kano ka por,” u la ong da kaba kdew ruh ba un sa shong thait hadien ba u la dap 70 snem ka rta.
Halor ki kam jong ka MP scheme jong u, u State President barim ka NPP u la ong ba u la sdang ban ïoh ïa ka MP scheme na ka bynta u snem 2022-2023 namar kam shym la don kano kano ka skhim kaba la ai ha ka por ba syllad ka khlam Covid. Ha katei ka por u ai ka jingmynjur ïa ki skhim sha ki nodal officer (deputy commissioner), ha kaba kin phah ïa kajuh sha ki block development officer (BDOs) ban pyllait ïa ka fund sha ki nongïoh myntoi ba kynthup ïa ki Dorbar Shnong bad ki seng.
Hynrei kane ka rukom treikam ka la kylla na ka bynta u snem 2023-2024. Ha ka jaka jong ka rural development department ha Delhi, ïa ka skhim la pyllait beit da ka parliament sha ki district officer bad sha ki BDO, u la ong.
Haba ong ba kam don kano kano kaba buhrieh, u Bah Kharlukhi u la ong ba u la pyntrei pura ïa ka pisa T. 5 klur ba la mang hapoh ka MP scheme na ka bynta u snem 2022-2023 katba ka skhim jong u snem 2024, ka dang poi mynta sha ki nongïoh myntoi. Ka jingpynslem ka long na ka daw jong ki general election sha ka Lok Sabha, kaba dang shudep kut dangshen.
Haba kylli, u MP u la ong ba ha ka jingïohi jong u ïa ki Social Media ka long, “Ki dei ki pukni kiba bam tang ïa ka doh pyut.”
