Shillong, Nailar, 07: Ka Ministry of Coal, lyngba ka jingpyrshang kaba ïaineh bad ka jingtrei shitom, ka la lah ban pynsuk ïa ka jingsdang jong ka jingtih dewïong da ka jingstad saïan ha ka Jylla Meghalaya.
Kane ka pyni ïa ka sienjam kaba kongsan ha kaba wanrah ïa ka rukom tih dewïong kaba la pynbeit ryntih bad kaba lah ban pynneh pynsah ïa ka mariang ha ka thaiñ Shatei Lammihngi jong ka ri India.
Halor kine ki jingpyrshang, ar tylli ki Coal Block ha Meghalaya ki la sdang ban pynmih hadien ba ki la ïoh ïa ki jingmynjur. Ki jingtip ba bniah shaphang ki par dewïong kiba dang treikam ki long ka Saryngkham-A Coal Block, ka East Jaiñtia Hills (la ai jingbit ha ka 10 tarik, Lber ) bad ka Pyndengshahlang Coal Block, West Khasi Hills (2 tarik, Jymmang), kiba la sdang ban pynmih dewïong ha ka 3 tarik, Jylliew bad 5 tarik Jylliew.
Une u mawjam u pynpaw ïa ka jingangnud jong ka Ministry ban kyntiew ïa ka rukom tih marpohkhyndew kiba long katkum ka aiñ, kiba shngaiñ bad kiba ïadei bad ka jingstad saïan katba ka nang kyntiew shuh shuh ïa ka jingnoh synniang jong ka thaiñ Shatei Lammihngi sha ka jingdonkam bording jong ka ri.
Ka Ministry of Coal ka khmih lynti ïa ka jingïatreilang na baroh ki Sorkar Jylla ha kaba pynjanai ïa ka jingtih dewïong da ka jingstad saïan bad ban pynbeit ïa ka jingshalan dewïong ha kylleng ka thaiñ. Kum kine ki jingïatreilang kin don ïa ka bynta kaba kongsan ha kaba pynthikna ïa ka jingïoh bording bad ban kyntiew ïa ka roi ka par ha ki jylla jong ka thaiñ Shatei Lammihngi.
