Shillong, Lber, 26: Ka Kynhun Myntri jong ka Sorkar Jylla ha ka sngi Balang ka la mynjur ïa ka jingtyrwa ban ai shuti Casual Leave kaba 30 sngi ïa ki nongtrei ka Sorkar Jylla.
Haba kren sha ki lad pathai khubor, u nongaitktien jong ka Sorkar Jylla Bah Paul Lyngdoh uba long ruh u Myntri ka Sorkar u la ong ba ka la don ka jingïapynbeit ïa ka circular ne ka jingpynbna ka barim ha kaba ki sngi shuti kyrpang ba la shah ïa ki nongtrei sorkar ban shim ki long tang 15 sngi ha ka sngi snem.
“Ngi la rai mynta ka sngi ba ki sngi shim shuti yn kyntiew noh sha ka 30 sngi,” u la ong.
“Kaba kham kongsan ka long ka jingdonkam ban ailad ïa ki nongtrei Sorkar, kiba ïashim bynta ruh ha ki jingïalehkai sports ha kano kano ka por, ha kaba ki jingïalehkai bapher bapher ki donkam ïa ka jingïashim bynta jong ki nongtrei Sorkar ka long kaba sngewkhia ïa kata ka por kyrpang yn kheiñ kum ka por ha kaba ki nongtrei sorkar ki pyndep shisha ïa ki kamram jong ki bad yn ym kheiñ kum ki shim shuti,” la bynrap u Bah Paul.
Katkum ka jingong jong u, kane kan ïarap ruh ïa ka jylla ban pynbiang ïa ki jingdonkam khamtam na ka bynta ka pynkhreh ïa ka lympung ïalehkai National Games ka ban sa long ha u snem 2027.
