Shillong, Risaw, 29: Ka Sorkar Jylla ka la mynjur ïa ka Meghalaya Village Defence Organization Rule, 2025 bad pynkiew ruh ïa ka jingsiew pisa ïa ki dkhot jong ki Village Defence Party (VDP) na ka T. 300 sha ka T. 3000.
Ïa kane ka rai la shim da ka Kynhun Myntri ba la pynïaid da u Myntri Rangbah ka jylla u Conrad K. Sangma ha ka sngi Balang.
Ha ka jingïakren ha ki lad pathai khubor hadien ba la wai ka jingïalang, u Myntri ka Sorkar Jylla Bah Wailadmiki Shylla uba long ruh u nongaiktien jong ka Sorkar MDA u la ong ba kane ka kyndon thymmai ka batai ïa ki bynta bad ki jingkitkhlieh jong ki VDP ha ki kyrdan bapher bapher, naduh ki jylla haduh ki district.
Ka jingpynkiew ïa ka jingsiew pisa la khmih lynti ba kan pynshlur ïa ki VDP ba kin treikam bha, khamtam ha kaba ïakhun pyrshah ïa ki kam runar ruser, ka jingkhaii drok bad ka jingïada ha khappud.
“Ngi kwah ba ki VDP kin long kiba trei shitom khamtam kumba phi tip ba ngi mad ïa ki jingeh na ki kam runar, ki jingdih buaid bad wat ha ki jaka khappud ruh. Ngi kyrmen da kane ka kyndon thymmai, nga tharai ngin lah ban pynshlur ïa ki shnong ban thaw ïa ki VDP,” ong u Bah Shylla.
U Myntri u la ai dak ba ka Sorkar ka thmu ban pynthymmai ïa ki VDP da kaba ai ïa ki Uniform, ki walkie-talkie bad ki jingpynshisha kiba biang.
Haba kyntait ban batai bniah ïa ka jingpynbiang ïa ki tiar ki tar, u Bah Shylla u la ban jur ba ka Sorkar ka dang trei ban pynkup bor ïa ki VDP na ka bynta ban pynneh pynsah ïa ka suk ka saiñ ha ki shnong ki thaw ba ki don.
