Shillong, Nohprah, 09: Ka kynhun myntri jong ka Sorkar Jylla ha ka sngi Baar ka la mynjur ban pynskhem kum ki nongtrei bapura ïa ki 221 ngut ki Nurse bad ki Paramedics kiba la shah thungkam hapdeng u snem 2008 bad 2012 bad mynjur ruh ïa ka Mental Healthcare Rules bad pynbha ïa ka kyndon aiwai jaka bad kiwei kiwei.
U Myntri Rangbah ka Jylla Conrad K. Sangma haba kren sha ki lad pathai khubor hadien ba la wai ka jingïalang u la ong, ‘ka kynhun myntri ka la rai ban pynskhem pura noh ïa ka jingthungkam ïa ki 221 Bonded Nurse bad kumjuh ruh ïa ki Bonded Paramedic kiba la shah thungkam hapdeng u snem 2008 bad 2012.”
Ha kane ka jingïalang, ka kynhun myntri ka la mynjur ruh ïa ka Meghalaya Pharmacists Service Rules, ïa ka Meghalaya Mental Health Care Rules bad ïa ka jingpynbeit thymmai ha ka Meghalaya Judicial Service Rules 2006 bad ïa ka Meghalaya Higher Judicial Service Rules 2015.
“Ngi la shim ruh ïa ka rai ban bynshet ha ki Deputy Commissioner na ka bynta ban pynthymmai ïa ki dulir ai wai jaka ha kaba ki nongshim wai kim donkam shuh ban wan sha ka Sorkar,” la ong u Myntri Rangbah.
“Kumba phi tip ki don bun tylli ki jaka ha ki bynta ka sor Shillong ïa kiba la ai wai na ka bynta bun bun snem bad ka jingpynthymmai ïa ka jingaiwai jaka ka ju long manla ka 30 snem. Ka jingpynthymmai ïa ki dulir ka shim por bha bad khnang ban pynsuk ïa ka kam ngi la aiti beit ha ki Deputy Commissioner ban pynthymmai ïa ki dulir,” u la ong.
