Shillong, Lber, 31: Hadien ba la ïoh pdiang ïa ki jingujor na ki paidbah nongshong shnong halor ka jingdon jong ki briew kiba ju pynïap dusmon ïa ki dohum dohwah, ki dkhot jong ka Village Defence Party ka shnong Mawïawa ki la pynlong da ka jingïaid pahara ha shilynter ki rud wah kiba don ha u pud u sam jong ka shnong khamtam ka Wah Riwiang bad ka Wah Mallen.
U President jong ka VDP u samla Sportlan Tyrsa ha u kyrwoh khubor u la ong ba ka VDP ka maham tyngeh ïa ki briew kiba pynïap dusmon ïa ki dohum dohwan da kaba theh dawai bih, ber tutia, shoh kharu, khang jar bad kiwei kiwei bad lada lap ka VDP kan pynshitom katkum ka aiñ ryngkat ka jingdain kuna kaba kot 40 hajar tyngka.
Shuh shuh u la ong ruh ba ka VDP kan ym shah shuh ïa ki nongtong doh ban sah miet ha ki wah bad naduh u bnai Naiwieng haduh u Jymmang ym nym shah ban tongdoh palat ïa ka 4:30 baje janmiet ha ki Wah namar ka jingdon jong ki riew shim kabu kiba ju pynïap pathar ïa ki dohum ha ka por mynmiet.
