Shillong, Nailur, 08: U Timothy D. Shira u la ong ba um don jingtip satia ïa ka daw ha lyndet ka jingresaiñ jong u na ka shuki Deputy Speaker.
“Ngam don eiei ban ong, tang kata hi. Ka shong ha ka High Command jong ka party,” la ong u Shira ha ka jingïakren bad ki lad pathai khubor ha ka lah sngi U Blei hadien ba la aiti ïa ka shithi resaiñ sha u Speaker ka Iingdorbar Thawaiñ u Thomas Sangma.
Haba kylli, u Shira u la ong, “hynin mynmiet nga la ïoh pdiang ïa ka phone call na u Myntri Rangbah bad u shu ong ba phi dei ban resaiñ noh lashai ka sngi. Kumta nga la resaiñ namar kum u dkhot ka party ngam lah ban ong em.”
“Ngam shym la kylli hi ruh balei namarba ngam kwah ban kylli namarba nga tip ka dei ka hok jong u,” u la ong.
U la ong ruh ba watla u dei u dkhot ba la slem ha ka NPP hynrei u la ong ba u ieh beit ha ka jingstad jong u Myntri Rangbah uba dei ruh u National President jong ka NPP.
“Ngam don eiei ban kren halor kane, namarba nga ladep aiti ïa ka shithi resaiñ katkum ka jingbthah jong ka High Command jong ka Party bad kaei kaba la bthah ïa nga ban leh nga la leh ruh ïa kata namarkata ka shong ha ka jingstad jong u Myntri Rangbah la u kwah ba ngan shong haei haei ne leit shaei shaei ïa kata ruh ngam tip.”
Haba kylli, hato phin shah kynthup neem ha ka kynhun Myntri ha ka jingbujli shuki, u Shira u la ong, ‘ïa kata ruh ngam tip bad ka dei ka mon jong u Myntri Rangbah. Ngam tip la ngan shah kynthup ne ngan shah weng ne shah phah shaei shaei ruh.”
“Namarba kin hap ban pynlong ruh ïa ka elekshon Deputy Speaker nga hap ban ailad. Ngam dei uba rhah bor, nga hun beit ïa kaei kaba nga ïoh. Kane ka dei ka jinglong jong nga ha ka saiñ pyrthei bad ngam ju dom. Nga don beit ka jingshaniah ha u Myntri Rangbah. Ngam lah ban ong em namarba u dei u Myntri Rangbah uba nga ieit eh,” la ong shuh shuh u Shira.
U la ong ruh ba um don jingtip eiei ïano ka NPP kan jied napdeng ki MLA ban shimti bujli ïa ka shuki Deputy Speaker.
