Shillong, Lber, 04: Lai ngut ki briew ki la mynsaw ha ka jingïatakhuh ka kali sumo bad ka kali Maruti 800 local taxi ha surok Shillong By-Pass, ha Umroi Nongrah, Ribhoi District ha ka sngi Baar.
Katkum ka jingtip ba la iohlum la ong ba kane ka la jia ha ka por 4:30 baje eiei katba ka local taxi kaba don ïa u nombar ML 05 L 1483 kaba dang mih na Bhoirymbong ban leit sha Umiam bad ka kali Sumo kaba don ïa u nombar ML 06 A 8396 ka dang don ha lynti ban leit sha Bhoirymbong, hynrei ynda poi ha ka shnong Umroi Nongrah kine ki ar tylli ki kali ki la ïa tyngkhuh paramaki kat haduh ba lai ngut ki briew kiba shong ha ka kali Maruti ki la mynsaw bad ka kali ka la pra phom.
Ki briew kiba shong ha ka kali sumo ki la kynnoh ba kane ka jingjia baroh ka dei namarba u nongñiah jong ka kali Maruti 800 u dei uba la shoh khawyiang kat haduh um lah shuh ban synshar ia u lakam jong ka kali.
Ïa ki 3 ngut ki briew kiba la mynsaw la pynkit noh marmar sha Bhoirymbong CHC ban ioh ka jingsumar bad ki Pulit ka Khapmara PIC ki dang pynlong ka jingtohkit halor kane ka jingjia.
