Shillong, Nailar, 30: Ar ngut ki rangbah Khasi na ka shnong Mawdiangsnam kawei na ki shnong khappud ka thaiñ Langpih ki la shah shoh dusmon ha u Pulit Assam uba dei u Incharge jong ka Assam Border Police Outpost ha Langpih kat haduh ba la mynsaw jur.
Kine ki ar ngut ki rangabh Khasi kiba la shah shoh ha u Pulit Assam ki dei kiba la tip kyrteng kum u Josaia Swangre bad u Welphus Swangre kiba dei na ka shnong Mawdiangsnam bad kane ka la jia ha ka por kumba 5:00 baje janmiet ha ka sngi Thohdieng katba ki dang wan ïew bad ïaid lynti sha shiliang ba don ka ïew Assam hapoh ka shnong Langpih.
Ïa kine ki ar ngut ki rangbah kiba la mynsaw la pynkit noh marmar sha Nonglang PHC bad kham hadien ki doctor ki la phah pynkynriah noh sha Civil Hospital, Nongstoin namar ka jingmynsaw ka la jur da ka jingïarap jong ki nongïalam ka Federation of Khasi Jaiñtia and Garo People, ka Ri Muliang Circle.
Ha ka jingïakren bad u nonglum khubor ka Batesi Tv u Bah Josaia Swangre u la ïathuh katba u dang wanphai na ïew kynsan kynsan uwei u jaidbynriew Rabha na ka shnong Boko u la kura ïa u bad haba u la kylli hynrei u Rabha u la byrngem ban shoh biang bad dei ha kum kata ka por ba u Rabha u la telephone ïa ki Pulit Assam bad na ka liang jong u Pulit Assam khlem tohkit eiei ruh em u la tangon beit ïa u Bah Josaïa Sangre.
U Bah Welphus Swangre haba ïohi ïa kane ka jingjia u la pyrshang ban leit ïarap hynrei ma ru ruh u la shah shoh lang kat haduh ba baroh ar ngut ki la mynsaw jur.
U bah Josaïa Swangre u la mynsaw jur na ki bynta jong ka tyrpeng bad na ka kjat katba u Bah Welphus Swangre u la mynsaw jur na ka bynta jong ka kjat.
