Shillong, Naiwieng, 18: Uwei u security guard uba trei ha North Eastern Indira Gandhi Regional Institute of Health and Medical Sciences (NEIGRIHMS) u la shah kem ha ka Lah Sngi u Blei janmiet halor ka jingkynnoh ba u la ñiah kali hapdeng ka jingbuaid kyiad bad tynrah da ka kali ïa ki arngut ki samla pule ka skulbah North Eastern Hill University (NEHU) kat haduh ba ki la mynsaw jur.
U Superintendent of Police ka East Khasi Hills Bah Vivek Syiem u la pynthikna ba ki Pulit ki la pynngat da ka kyndon ba thmu pynïap pyrshah ïa u nongshah kynnoh, u Permen M Sangma, uba la don mynta ha ka along ki Pulit.
“Ngi la kem ïa u briew uba donkti halor kane ka jingjia. Ngi la register case ruh pyrshah ïa u bad ïa ka kali ruh ngi la kurup,” la ong u Bah Syiem.
Haba kylli, u SP u la ïathuh ba ki Pulit ki la pynngat ïa u nongshah kynnoh hapoh ka Section 109 jong ka Bharatiya Nyaya Sanhita (BNS) kaba hap hapoh ka kyndon ba thmu pynïap briew.
Kane ka jingjia, ka la jia ha ka por kumba 7:30 janmiet ha Gate No. 2 jong ka phyllaw ka skulbah NEHU, ha kaba ka kali ba la ñiah da u Sangma ka la rat ha ka rukom kaba ima bha ïa ki arngut ki samla pule ka Department of Chemistry, kat haduh ba ki la mynsaw jur.
Ïa ki arngut ki samla pule kiba la tip kyrteng kum ka samla Daritngen Pohdukhei bad ka samla Stephanie Shadap la pynkit noh mar mar sha Civil Hospital bad kham hadien katto katne por la pynkit noh sha Nazareth Hospital bad la pynthiah ha Intensive Care Unit (ICU) namarba la jur shaba palat ka jingmynsaw.
Katkum ka jingïathuh jong u SP, u Sangma uba trei kum u Security Guard ha NEIGRIHMS Hospital u dei uba sah ha ka ktem sah ki Security kaba don hapoh ka phyllaw jong ka NEHU.
Katkum ka kaiphod medical examination, u Sangma u la dih kyiad ha ka por ba la jia ka jingaksiden bad ka jingdon jong ka kyiad ha ka snam ka la pyni ba um lah shuh ban ñiah wat ïa ka kali.
“Ngin sa tian bishar ïa u ha Kashari mynta ka sngi bad ngin sa pan bor ruh ban ïoh set ha along Pulit,” la ong u Bah Syiem.
Ki Pulit ki dang ap ïa ka kaidphod jong u Motor Vehicle Inspector (MVI) ban pynthikna la ka don shisha neem ka jingthud ha ka kali kaba lam sha ka jingjia aksiden.
U SP u la ong ruh ba kane ka jingjia kam dei shuh kaba rit, hynrei yn sa thung shuh shuh ïa ka jingtohkit ban lap shuh shuh ïa ki daw tynrai kiba lam shaduh u pud ban jia ka jingaksiden.
“Ngi hap ban peit ruh ïa kiwei pat ki daw namarba ka dei ka jaka kaba heh, bad ki bording ruh ki shai bha hynrei ban ñiah stet ïa ka kali haduh katto katno bad ban ym ïohi shuh wat ïa kiba ïaid ha surok ka dang donkam shuh shuh ban dang tohkit bniah,” la bynrap u SP.
Katkum ki CCTV ba la saphriang ha social media la ïohi ba ka kali kaba la pynher stet bha ka la tynrah beit beit ïa ki arngut ki samla kynthei kiba dang ïaid lynti shwa ban poi ha Gate-2. Shwa kata, ka kali ka la rat shwa ïa kawei ka scooty, bad ïa ka khyrdop.
