Shillong, Nailar, 30: Ki nongïalam jong ka Khasi Students Union (KSU) Delhi Unit ha ka sngi Saitjaiñ ki la pyntip ba ki la ïoh ïa kawei ka phone call na kawei ka Nurse kaba don ha Shilllong bad na u doktor uba trei ha AIIMS Hospital, Delhi ha kaba ki la pyntip ba ka don kawei ka samla Khasi ka bym pat lah ban tip kyrteng kaba dei na Shillong kaba don mynta hapdeng ka jingmynsaw jur.
Ka President jong ka KSU Delhi Unit ka samla Marbiang Khongwir ha u kyrwoh ka la ïathuh ba tang shu ïoh jingtip halor kane ka jingjia ki la leit marmar sha Hospital ban wad jingtip shaphang kane ka samla Khasi kaba don hapdeng ka jingbym tip briew bad kaba dang shah sumar mynta ha ka Critical Care Unit (CCU) ka AIIMS Hospital, Delhi.
“Ynda ngi kylli na ki doktor i (samla kynthei Khasi) wan badno, ki (doktor) shu batai ba wan buh uwei u shynrang bad ngim tip hi ruh wat ïa ka kyrteng jong ine i khynnah namarba ym don pla, ym don mobile phone bad ym don jingtip eiei ruh em. Ynda ngi la peit ïa ine i khynnah i don hapdeng ka jingbymtip briew bad i don hapdeng ka jingshitom kaba jur bha,” la ïathuh ka samla Marbiang Khongwir.
Ka la ïathuh shuh shuh ba ha ka jingleit tohkit na ki Pulit kiba don hapoh ka AIIMS Hospital, Delhi la pyntip ba la leit buh ïa kane ka samla Khasi ha kane ka hospital da uwei u shynrang briew na Noida da kaba shu ong ba kane ka samla Khasi ka la mynsaw ba ka ur.
“Ynda ngi la pan ïa ka medical report na ki doktor kam ikop shuh ban shu ong ba i (samla kynthei Khasi) ur bad na ka liang jong ka seng ka suba ba don eiei halor kane ka jingjia. Ha ka medical report la thoh ba ha ka pelvic region (bynta jinglong kynthei) ka la mong, ki shyieng krung ruh ki la kdiah, ki kjat ki shympriah kti ruh ki la kdiah. Ki jingmynsaw ki la bun,” la ïathuh ka President jong ka KSU Delhi Unit.
“Ïa mynta ngim pat lah ban batai bniah hynrei na ka liang jong ka seng ngi shu wan ap ïa i hapoh hospital bad ngi kyrmen ba lashai ka sngi (ngin sa lah ban ïoh jingtip shaphang jong i) namarba mynta i dang don hapoh ka Critical Care Unit (CCU) bad ngi shu kyrmen ba in tip briew noh kham kloi khnang ba ngin ïoh jingtip kham kloi shaphang ka jingjia ïa i,” la bynrap shuh shuh ka samla Marbiang.
