Shillong, Ïaïong 30: Ki Pulit ki la kem noh ia uwei u runar uba la tip kyrteng kum u Jacinth Sanglyne na ka shnong Nongnah-Nongkdait uba thmu ban dkhat jubor ia ka jingim jong kawei ka longkmie kaba la don kumba 26 snem ka rta da kaba ot da ka tari na u ryndang.
U Superintendent of Police ka South West Khasi Hills District Bah B. Jyrwa ha u kyrwoh u la pyntip ba kane ka la jia ha ka sngi Balang ha ka por kumba 3:00 baje noh phai sngi.
Tang shu ïoh jingtip halor kane ka jingjia, ka kynhun ki Pulit na Ranikor Police Station ki leit mar mar sha ka jaka ba la jia bad kem noh ïa u runar uba donkti na ka shnong ba u sah bad na ka iingsah jong ka longkmie kaba la shah ot ryndang ki Pulit ki la ïoh kurup ruh ïa ka tari ba la pyndonkam da u runar.
U la ïathuh ruh ba ïa ka longkmie kaba la mynsaw jur la pynkit noh marmar sha Civil Hospital Mawkyrwat bad mynta ka dang don hapdeng ka jingshah sumar.
Ki Pulit ki la registar case ha Mawkyrwat Women Police Station bad ka kynhun jong ka Crime Scene Unit bad ka Fingerprint Unit Team ki la leit ban lum ïa ki sakhi sabut na ka jaka ba la shah ot ryndang ka longkmie.
