Shillong, Nailar, 20: Arngut ki briew, kynthup ïa uwei u shipai Border Security Force (BSF) ki la mynsaw ha ka jingbthei ba la suba ba u dei u tyndong lyer shet jingshet (Cylinder) ha kawei ka ïing ha Umpling, Lumdiengmet, ha ka miet sngi Baar.
Ka jingbthei kaba la jia ha ka por 9:00 haduh 9:30 baje mynmiet eiei ka la kyndit lut ïa ki longing longsem kiba don markhap namarba ka jingbthei ka la long kaba khlaiñbor bad kaba la pynkhynñiuh lut ïa ki ïingsah kiba don marjan.
Ki Pulit ki suba ba ka jingbthei ka lah ban dei na ka jinglait lyer jong ka Gas lane ka lah ban dei ka jingbthei jong u LPG cylinder, watla ka jingtohkit ka dang ïaid shakhmat ban tip ïa ka daw tynrai.
U Superintendent of Police ka East Khasi Hills u Bah Vivek Syiem tang shu ïoh jingtip halor kane ka jingjia u la leit mar mar ryngkat bad ka kynhun Pulit ban pynlong ïa ka jingtohkit kaba bniah.
Ïa u shipai BSF ba la mynsaw la ithuh kyrteng kum u Sandeep Kumar bad uwei pat u dei uba la tip kyrteng kum u Subham Cheran Momin, kiba don hapoh ka ïing hadien ba la jia ka jingbthei.
Ïa kine ki arngut la pynkit noh sha mar mar sha Hospital ka tnat shipai BSF kaba don ha Umpling, hynrei na ka daw ka jingjur ka jingmynsaw kham hadien la pynkynriah noh ïa ki sha NEIGRIHMS Hospital ban ïoh ïa ka jingsumar kaba kham bha.
U nonglum khubor uba la leit jurip u la lap ba ka jingbthei kaba khlaiñbor ka la pynjulor ruh ïa ka ïing bad ïa ki katto katne ki ïing ba don markhap.
Ki briew ba don ha kane ka jaka ki ïathuh ba u shipai BSF uba la mynsaw u dei uba dang leit rung ha ïing jong u Momin ban ïathuh ba ka don ka jingsma Gas khnang ban pynlip noh ïa u Cylinder hynrei dei ha kum kata ka por ba ka la jia pynban ka jingbthei kynsan jong u tyndong lyer shet jingshet.
Kat haduh ka por mynsngi ka sngi Balang ki Pulit ki dang pynlong ïa ka jingtohkit bad lum ruh ïa ki sakhi sabut na ka ïing ba la julor na ka jingbthei.
