Shillong, Rymphang, 04: U registrar-in-charge jong ka skulbah North Eastern Hill University (NEHU) u Kailash Chandra Biswal u la mynsaw na ka khlieh hadien ba u la shah thombor ha ki runar kiba kah durkhmat hajan ka surok Mawlai bypass, Shillong.
Katkum ka jingtip ba la ïohlum na ki Pulit la ïathuh ba kane ka la jia ha ka janmiet Lah Sngi u Blei mynta ka taiew katba u Biswal u dang mih na ka skulbah. La kynnoh ba ki don kumba phra ngut ki briew kiba kah durkhmat ïalade ki la pakhang lynti ïa ka kali jong u bad kynsan kynsan ki la sdang ban kawang da ki maw, ha kaba uwei na ki u la dei ïa u na ka khlieh.
La ïathuh ruh ba kane ka jingshah thombor ka la jia ha ka jaka kaba bun briew bha. Ki nongshong shnong bad ki nongdie dukan ki la mareh bran bran tang shu ïohsngew ïa ka jinghylla kaba la pynlong ïa ki nongthombor ban phet krad noh na kane ka jaka.
Mar mar la pynkynriah noh ïa u Biswal sha NEIGRIHMS Hospital ban ïoh jingsumar. Ki Pulit ki la ïathuh ba mynta u dang don hapoh ka jingsumar jong ki doktor Neurology.
Ki Pulit ki la register case halor kane bad pynlong ïa ka jingtohkit ban lap ksai bad ban ïohkem ïa kiba donkti ha kane ka jingjia.
U Biswal dang shen u la shah thung kum u Registrar-in-charge jong ka NEHU Shillong Campus ha u Vice-Chancellor ka NEHU u Prof. Prabha Shankar Shukla.
Kane ka la wan hapdeng ka jingïakynad ha ka liang pynïaid kam kaba dang ïaid shakhmat hapoh ka skulbah, namar la ïathuh ba u Vice-Chancellor u la pep trei na ka jaka pule naduh ka 17 tarik, Naiwieng, 2024, hadien ka jingkynnoh ba ki don ki jingbym ïaid beit ha ka liang ka jingpynïaid kam ha kaba la kynnoh ba ki la ktah ïa ka jingtreikam ba manla ka sngi hapoh ka skulbah.
