Shillong, Naitung, 08: Ka jingïa kajia bad ka jingïashoh ïadat hapdeng ki ar tylli ki longïing ha Mawlai Nongmali, Shillong ka la lam shaduh u pud ka jingshahdung tari ha kaba uwei u samla uba la tip kyrteng kum u samla Khrawbok Khongsit, 24 snem u la mynsaw bad la pynkit noh sha Dr. H. Gordon Robert Hospital, Shillong ban ïoh jingsumar.
Katkum ka jingtip ba la ïohlum la ïathuh ba u Khrawbok Khongsit ula mynsaw na ki bynta jong ka kti ha kane ka jingjia ha ka miet shiteng synnia.
“Ka dei ka jingïashoh hapdeng ki ar kynhun ki longïing bad ka la sdang naduh mynstep. Ngi khlem ïoh jingtip ba ka don kum kata ka jingjia mynstep. Mynin shiteng miet ngi la ïoh jingtip ba ka don sa kawei ka jingïashoh kaba dang bteng bad tang shu ïoh jingtip u OC ka Mawlai PS u la leit mar mar sha kato ka jaka ban tem ïa ka jingïakynad bad u la lap ba ka don ka jingïashoh bad u Bah Khrawbok Khongsit, 24 snem ka rta u la mynsaw na ka kti,” la ïathuh u SP (City) Bah Herbert Pynïaid Kharkongor ha ka jingïakren bad ki lad pathai khubor ha ka sngi Baar.
“Mynta ngi la register ïa ka case bad ka jingtohkit ka la ïaid shakhmat,” u la ong bad ïathuh ba ka jingïa kajia ka dei hapdeng ar tylli ki longïing.
Haba kylli, u la ïathuh ba ka tnat Pulit ka la shimkhia bha ïa kane ka jingjia. U SP (City) u la ïathuh ba ki Pulit kim pat kem satia ïano ïano ruh halor kane ka jingjia.
