Shillong, Naitung, 24: Uwei u samla ba la tip kyrteng kum u Fulningstar Kurbah, uba la don kumba 24 snem u la mynsaw jur hadien ba ka thuk thuk R-15 kaba u ñiah kaba don ïa u nombar ML05 R-5389 ka la pra na ka jingïatakhuh bad kawei ka kali Bolero Pickup kaba don ïa u nombar ML15-1518 ba la ñiah da u Bah Kampher Shangoi uba la 28 snem ka rta.
Kane ka la jia ha ka 24 tarik, Naitung, 2025 ha ka por kumba 4 baje janmiet ha Lad Miri, ha surokbah National Highway 44-E katba u samla Fulningstar Kurbah u dang wan phai na Mairang ban leit phai noh sha la iing sha Mylliem.
Katkum ka jingïathuh jong kiba la sakhi ïa kane ka jingjia, la ong ba dei u samla Fulningstar Kurbah uba la ñiah pynher stet bha ïa ka thuk thuk bad ynda poi ha kane ka jaka u la leit tynrah beit beit ïa ka kali Bolero kaba dang wan na Shillong.
Ki paidbah kiba la lap ïa kane ka jingjia, ki la pynkit noh mar mar ïa u samla Fulningstar Kurbah sha Civil Hospital Mairang ban ïoh ïa ka jingsumar.
