Shillong, Ïaïong 03: Uwei u briew ula mynsaw na ka jingshah siat kuli hadien ka jingïoh siat bakla uwei u CRPF ïa ka suloi AK katba u dang pyrshang ban pynïeng ïa ka kali kaba pyrshang ban tynrah ïa ka kynhun ïaid pahara ha Mendipathar, North Garo Hills.
Kane ka jingjia ka la jia ha ka miet sngi Balang, katba ka kynhun ïaid pahara ka Mendipathar Police Station bad CRPF ki dang ïaid pahara hajan ka Pushpa Cloth Store, ha Ïew Mendipathar, kynsan kynsan la wan kawei ka kali AN01-AM-7750 kaba la pynher sted bha bad pyrshang ban tynrah ïa ki CRPF kiba dang shong ha shuki ka Pushka Cloth Store.
Ha kaba ïadei bad kane haba ïohi ïa ka jingma, ki CRPF ki la mareh na katei ka jaka ban ïada ïa la ka jingim bad ki la leit tur sha ka kali hynrei u nongñiah u la pynïaid biang shakhmat ïa ka kali haba pyrshang ban tynrah bad phet krad syndon ïalade, iathuh ka khubor na ki pulit.
Ha kane ka jingjia, haba ïohi ïa ka jingma bad ka jingthmu thombor ki runar, kane ka kynhun pahara ka la pyrshang ban pynsangeh ïa ka kali bad ha ka jingïada ïalade, uwei u CRPF ula pynap da ka suloi AK bad pyrshang ban plie ïa ka jingkhang kali hynrei katba u dang plie ïa ka jingkhang, u nongñiah ula pyrshang phet biang kaba ha ka jingïaid kynsan ka kali, une u CRPF ula kum siat bad dei ïa uwei pat uba shong hapoh ka kali ba la tip kyrteng u Neobirth R Marak (28) ba na ka shnong Thapa Darenchi.
La ong ba une u kuli ula leit dei na ki bynta jong ka lbong jong une u briew bad la pynkit noh mar mar ïa u sha Mendipathar PHC ban ïoh jingsumar.
Halor kane na ka liang ki Pulit ki la kem ruh ïa u nongñiah ka kali ba kyrteng u Sengrim K Sangma ba na ka shnong Thapa Darenchi.
Katkum ka kaiphod ki doktor, la pynthikna ba kine baroh arngut ki la shoh khawiang bha. Ha ka jingtalasi ïa ka kali, ki Pulit ki la ïoh kurup bun bah ki bitor beer bad kiwei ki tiar.
