Shillong, Nohprah, 12: Uwei u runar nongtuh ïa uba la tip kyrteng kum u Sandy Nongsiej uba la kam ba u dei uba sah ha ka shnong Lower Mawprem, Bishop’s Fall, Shillong ha ka sngi Thohdiewng u la shah kem ha ki paidbah hadien ba u la prong tuh ha kawei ka iing kaba don ha Jaïaw Upper Lan Sona Lane, Shillong.
Ki samla jong kane ka shnong, ki la ïathuh ba ki don arngut ki nongtuh kiba prong hapoh ka ïing hynrei ki la ïoh bat tang ïa u Sandy Nongsiej katba uwei pat u paralok nongtuh uba don lang u la lait phet bad ïoh rah lang ruh shiteng ki tiar ba ki la ïoh tuh napoh ka iing.
Ka trai iing ka bym kwah ban pynpaw kyrteng ha ka jingïakren bad u nonglum khubor ka Batesi TV ka la ïathuh ba ki runar nongtuh ki la prong tuh hapoh ka iing ha ka por kumba 12:45 baje mynsngi.
Hadien ba la ïoh bat ïa u nongtuh, la lap ba u la rong ïa kawei ka Television, ïa ki dhara da kaba kyndang ïa ka alamari dieng bad tuh ruh ïa ki ar tylli ki khra plastik ba ju pynlang pisa da kaba lied ïa ka almari Godrej bad kiwei kiwei ki mar.
Ki Pulit ka Lum Diengjri Police Station kiba la ïoh ujor halor kane ka jingjia ki la leit ban shimti noh ïa une u runar bad rah noh ïa u sha thanat ryngkat bad ki tiar ba u la tuh.
