Shillong, ïaïong, 07: Ki dkhot jong ka Federation of Khasi Jaiñtia and Garo People (FKJGP) South East Khasi Border Circle ka la ïoh ban bat ïa ki trok kit Coke kiba ïaid ha ka por mynsngi mynshai wat hadien ba ka seng ka la aiti da ka jingthoh sha ki bor synshar jong ka East Khasi Hills District ban pynsangeh ïa ka jingïaid jong ki trok kiba kit Coke mynsngi.
Kine ki trok kiba ki dkhot jong ka FKJGP ki la bat ha ka shnong Mawrapat, kaba hap ha ka Hima Malai Sohmat, East Khasi Hills District ki dei kiba mih na ka thaiñ Nongjri kiba ïaid lyngba ïa ka surok Photkroh, Umpung, Balat, Mawsynram shaduh Weiloi kat haduh ba ka la pynwit bha ïa ka leit ka wan jong ki paitbah nongïaid nongïeng khamtam ïa ki kali kit nongpang namarba ka surok ka long kaba rit, ba kyllaiñ bad kaba sniew shaba palat.
Ha kajuh ka por ka surok Photkroh, Umpung, Balat, Mawsynram shaduh Weiloi ka dei kaba ka tnat PWD (Roads) ka dang maramot bad kane ka pynthud haduh katta katta wat ïa ka jingtrei namarba ka dang dei ka por trei por ktah ha ka por mynsngi.
Kumta ka seng ka la maham ba lada ki bor synshar District kim leh eiei ka seng kam banse ban shim da kiwei pat ki sienjam ban leh na ka bynta ka jingmyntoi jong ki paitbah nongshong shnong.
