Shillong, Naitung, 01: Ka long kaei kaei kaba pynkyndit ban ïohi ba ki mynder Bangladeshi ki nud ban lute pyllein pyllein wat ha ka por mynsngi mynshai ïa ki jingdon jingem jong ki paitbah nongshong shnong na u pud u sam jong ki shnong kiba don ha shilynter ka khappud jong ka ri India bad ka ri Bangladesh ha ki bynta jong ka South West Khasi Hills District bad kane ka pyni shai ba ki shipai ïada khappud ne ki Border Security Force ki la phiel ban ïada ïa u pud u sam jong ka ri ha kaba ki mynder ki ïoh ban ïaid sahuh.
Katkum ka tyllong khubor ba la ïoh lum, la ïathuh ba kine ki shnong ba ki mynder Bangladeshi ki prong tuh pyllein pyllein mynsngi mynshai ki kynthup ïa ka Borsora, Cheragoan, Rongdu, Bagli, Kalagoan, Rajaju, Lakma, Sawlymbor, Nongjri bad Nonghyllam.
Lyngba ki video ba la ringdur da ki paitbah ha kine ki shnong ïa kiba la phah sha ki lad pathai khubor, la ïohi ba ki mynder ki la kit ha ki byrni ïa u dewiong khlem kano kano ka jingshah tuklar bad ka jingshah pynwit.
