Shillong, K’lyngkot, 14: Kawei ka longkmie bar jylla kaba la tip kyrteng kum ka Devi Basumatary ka la ujor da ka ejahar sha ki Pulit ka Laitumkhrah Police Station pyrshah ïa uwei u nongtuh uba la prong tuh hapoh ka iingsah jong ka ha Upper Lachaumiere ha ka 13 tarik, Kyllalyngkot, 2026 ha ka por kumba 2 baje noh sngi.
Ha ka ejahar ba la mudui ha ka 14 tarik, Kyllalyngkot, 2026 ka Devi Basumatary ka la ïathuh ba ynda la poi ha iing hadien ba la wan phai na Laitumkhrah ka la lap ba ka jingkhang nakhmat iing ka la plie bad u don u nongtuh hapoh ka kamra kaba ar uba dang khynra ban wad ïa ki mar ba remdor. Ha ka por ba ka la thmu ban khang ïa u hapoh ka kamra bad pyrta jingïarap hynrei u nongtuh u la khynniat ïa ka jingkhang bad u la tangon kylla ïa ka na khlieh da u nar rod bunsien bad patrong na u ñiuh khlieh jong ka bad tied ruh da u nar na ka kti kamon jong ka ryngkat ka byrngem byrsit ban pynïap noh ïa ka.
Ka la ïathuh shuh shuh ba u nongtuh u la knieh ruh ka pla kieng ba ka la thep ïa ka mobile phone, ki shabi iing, ka pisa kumba shi spah tyngka bad hadien kane u la khang kut ïa ka hapoh ka kamra kaba ar.
Katkum kane ka ejahar, ka Devi Basumatary ka la ïathuh ba une u nongtuh u dei uba dang kham samla, ka durkhmat kaba iong bad u don ka rynieng kaba jrong kumba san phut tam eiei bad u phong da ka patlun rong Khaki bad ka juti kaba long thik kum ka rong jong ka patlun.
Ka la ïathuh ruh ba ka khun kynthei kaba la wan phai sha ing ha ka por kumba 5 baje janmiet ka la lap ïa ka kmie ba ka la shah khang kut hapoh ka kamra ka baar bad shu thiah lyngktop ha madan hapdeng ka jingmynsaw bad ka jingmih snam na ka khlieh.
