Shillong, Jylliew, 16: Ki Pulit ka East Khasi Hills kiba pynlong ïa ka jingtohkit kaba bniah ha ka sngi Baar kin sa ïalam sha Sohra ïa ka Sonam Raghuvanshi, ïa u samla jong ka, u Raj Kushwaha, kynthup ruh ïa ki paralok jong u, u Vishal Chauhan, u Anand Kurmi bad u Akash Rajput kiba donkti ban pynïap ïa u Raja Raghuvanshi ha Parking Lot Wei Sawdong, Sohra, East Khasi Hills ha ka 23 tarik Jymmang ha ka por kumba 2:18 minit noh phai sngi.
U SP u jingtohkit ïa kine ki san ngut ka dang ïaid shakhmat ban lap shuh shuh ïa ki kam bymman ba ki la ïasuhbuit shwa ba kin pynïap ïa u Raja Raghuvanshi.
Ka jingthmu jong ki Pulit ban ïalam ïa kine ki san ngut sha Sohra ka long ban lap shuh shuh ïa ki sakhi sabut shwa ba kin pynngat ha ki kyndon ba kham eh.
Ïa ka met jong u Raja Raghuvanshi la lap na riat mot Arliang kaba don hajan Wei Sawdong ha ka 2 tarik, Jylliew da ki kynhun ai jingïarap kiba wad ïa u Raja Raghuvanshi bad ïa ka kurim jong u ka Sonam hadien ba la mih ka khubor ba kine ki shi kurim ki la jah rngai katba ki dang wan na Nongriat ha ka 23 tarik Jymmang.
Dang shen ki Pulit ki la lap ïa ka wait na ka jaka ba la pynïap ïa u Raja Raghuvanshi bad ïa ka jaiñ jri kup slap.
Ka Kashari ka la aibor 8 sngi ïa ki Pulit ban pynlong ïa ka jingtohkit kaba bniah pyrshah ïa ka Sonam Raghuvanshi, ïa Raj Kushwaha, kynthup ruh ïa ki paralok jong u, u Vishal Chauhan, u Anand Kurmi bad u Akash Rajput.
