Shillong, Risaw, 21: Ki bor synshar ka West Jaiñtia Hills District ha ka sngi Baar ki la pyntip ba ki nongrep ka shnong Lapangap kin sa ïohlad ban leit ot noh ïa u kba uba la ih na ki pynthorkba kiba don shajan ka shnong Tahpat ha ka sngi Balang.
U Deputy Commisisoner jong ka West Jaiñtia Hills ula pyntip ïa kane hadien ba ki bor synshar ka West Jaiñtia Hills District bad ka West Karbi Anglong District ki la khot sha ka miej jingïakren ïasuk ïa ki nongïalam shnong jong ka shnong Lapangap bad Tahpat ha ka Lah Sngi u Blei ha ka jingïalang kaba la long ha Border Out Post ha ka shnong Khanduli.
Ka jingïakren ïasuk hapdeng ki Khasi Pnar bad ki Karbi ka la urlong da ka jingtuklar jong u Myntri Rangbah ka Jylla Meghalaya u Conrad K. Sangma, u Chief Executive Member (CEM) ka Karbi Anglong Autonomous Council (KAAC) bad ki nongsynshar shnong.
“Khnang ban pynneh ïa ka shongsuk shongsaiñ, yn sa phah pahara ruh ïa ki Magistrate bad ïa ki bor Pulit,” la pyntip u Deputy Commisisoner jong ka West Jaiñtia Hills District bad bynrap, “kane ka jingthmu ka long ban ai jingïada ïa ki nongrep bad ban ïada na kino kino ki jingshah pynthud ha ki bor kiba nabar kaba lah ban pynthud ïa ka shongsuk shongsaiñ.”
“Ki bor synshar district ki shim ruh ïa kane ka kabu ban buh jingkynmaw ïa ka jingïaishah, ka jingkohnguh bad ka jingbym pynibor jong ki nongshong shnong ka Lapangap hapdeng kine ki khyndiat sngi. Kane ka mynsiem jingïatreilang jong ki ka la wanrah ïa u soh jong ka jingjop,” ong bynrap u kyrwoh.
“Ki bor synshar district ki la kut jingmut ban pynthikna ïa ka jingïaid beit ka jingot kba ba khlem pynmih ïa kano kano ka jingïakynad ha ki sngi ki ban sa wan, bad pan ruh ïa ka jingïatreilang na ki kynhun bapher bapher ban pynneh pynsah ïa ka shongsuk shongsaiñ,” la ong u kyrwoh.
