New Delhi, Jymmang, 10: Hadien saw sngi ka jingïather namding mar kylliang, ka ri India bad ka ri Pakistan ki la mynjur ban sangeh noh ïa ka jingïasiat na ryngkew, na suiñ bad na duriaw naduh ka por 5 baje janmiet sngi Saitjaiñ.
U Myntri ka Sorkar Pdeng uba khmih ïa ka Ministry of Foreign Affairs u S. Jaishankar u la pyntip ba kine ki ar tylli ki ri ki la poi sha ka jingïasngewthuh jingmut.
Ka India ka la pynthikna ïa ka jingsangeh hadien ba u President ka United States u Donald Trump u la pynbna ïa kane ha ka rynsan Social Media.
“Hadien ka miet kaba jrong jong ka jingïakren ba la long ksiang da ka ri America, nga sngewkmen ban pynbna ba ka India bad ka Pakistan ki la mynjur ïa ka jingsangeh ïasiat. Khublei ïa baroh ar tylli ki ri kiba la pyndonkam ïa ka bor sngewthuh. Khublei shibun ïa ka jingshimkhia jong phi ïa kane ka kam!” la thoh u Trump.
U Foreign Secretary ka Sorkar Pdeng Vikram Misri, ha u kyrwoh u la ong, “ki Director General of Military Operations (DGMO) jong ka India and Pakistan ki la ïamynjur ba baroh ar liang kin sangeh noh ïa ka jingïasiat bad ïa ka jingpynbhorti shipai na khyndew, na suiñ bad na duriaw naduh ka por 5 baje janmiet.’
U la bynrap, “”la jingbthah sha baroh arliang ban pyntreikam ïa kane ka jingïasngewthuh jingmut. U The Director General of Military Operations un sa ïa kren biang ha ka 12 tarik, Jymmang, ha ka por 12:0000 baje.”
Ka India ka la ong ba u DGMO ka Pakistan u la sdang ïa kane ka jingkhot ha ka por shiteng sngi, hadien kane ka la don ka jingïakren bad la poi sha ka jingïasngewthuh jingmut.
“Kam shym la don kano kano ka rai ban pynlong ïa ka jingïakren halor kiwei pat ki mat ha kino kino ki jaka,” la pynpaw ka tyllong khubor.
Da kaba pynpaw ïa ka jingmaham hadien ka jingsangeh ïa ka jingïasiat, ka Sorkar ka la ong ba kan dang long kaba “pynkhreh pura” bad “kaba husiar bha” bad kano kano ka jingpynibor da ka Pakistan ha ki sngi ban sa wan kan dei da ka “jingjubab kaba kham tyngeh.”
Ka jingïasangeh ïasiat bad ka Pakistan ka dei kaba don kyndon bad kam don kano kano ka jingkylla nongrim na ka India halor ki lad jingïadei pyrshah ïa ka ri ba marjan kynthup ïa ka jingpynsangeh ïa ka Indus Water Treaty, ong ka tyllong khubor.
Ka India ka la maham ba “kano kano ka kam pyntriem yn kheiñ kum ka jingshah hiar thma.”
U Jaishankar, haba pynthikna ba ki ar tylli ki ri ki la poi sha ka jingïasngewthuh jingmut, u la ong ba ka India kan dang bteng ban ieng pyrshah ïa ki kam pyntriem da ki seng lehnoh.
“Ka India bad ka Pakistan mynta ka sngi ki la poi sha ka jingïasngewthuh jingmut halor ka jingsangeh ïasiat bad ka jingpynibor da ki shipai. Ka India ka la bat beit ïa ka jinglong kaba skhem bad kaba khlem pyndem pyrshah ïa ki kam lehnoh la ka long ha kano kano ka nongrim. Kan dang ïai bteng ban leh kumta,” la thoh u Myntri ha ka rynsan X.
U Symbud Myntri Rangbahduh ka ri Pakisatan bad u Myntri ba khmih ïa ka tnat Foreign Affairs u Ishaq Dar u la pynskhem ïa kane ka jingsangeh ïasiat.
“Ka Pakistan bad ka India ki la ïa mynjur ban sangeh noh mardor ïa ka jingïasiat. Ka Pakistan ka la ïaleh ban pynneh ïa ka jingsuk bad ka jingshngaiñ ha kane ka thaiñ, khlem da pyndem ïa ka jinglaitluid bad ïa ka jinglong trai halor u pud u sam,” ong u Dar ha ka rynsan X.
Ka jingïadei hapdeng ka India bad ka Pakistan ka la shah ktah hadien ba ki ehrang ba snar ki la synreit kuli ha kawei ka law bniap ba pawnam ha Pahalgam, Jammu and Kashmir, ïa kaba la jer kyrteng kum ka “mini Switzerland”, kaba la jia ha ka 22 tarik u bnai baladep. Ki snar lehnoh ki la synreit kuli naphang ïa ki nongjngohkai pyrthei kiba don ha ki jaka bam, kiba shong kulai bad kiba dang bam khana. 26 ngut ki briew ki la ïap ha kane ka jingshah thombor. Ka India, ka la kynnoh ïa ka Pakistan halor kane ka jingthombor katba ka Islamabad ka la kyntait mardor ïa kane ka jingkynnoh.
Ka India ka la ther kylliang ïa ki ktem sah jong ki lehnoh, ha ka kyrteng Operation Sindoor, ha ka step sngi Balang kum ka jingai jubab ïa ka jingjia ha ka Pahalgam bad khyrwit haduh 9 tylli ki ktem sah jong ki lehnoh kiba don ha Pakistan bad ha Pakistan Occupied Kashmir (PoK).
Ka Pakistan ka la ther kylliang ïa ki shnong kiba don ha khappud ka ri India da kaba pyndonkam ïa ki namding bad ïa ki Drone hynrei ka India ruh ka la ïoh ban siat pynhap.
Tang hapoh khyndiat por ba u President ka US ula pynbna ha ka rynsan X, u Secretary of State Marco Rubio u la ong ba ma u bad u Vice President JD Vance ki la ïakren bad ki ophisar jong ka ri India bad Pakistan, kynthup ïa ki arngut ki Myntri Rangbah jong kine ki ar tylli ki ri ban poi noh sha ka jingïasangeh ïasiat.
“Ha kine ki 48 kynta ba ladep, ma nga bad u @VP Vance ngi la ïakren bad ki heh ophisar jong ka India bad Pakistan, kynthup ruh ïa u Myntri Rangbahduh Narendra Modi bad u Shehbaz Sharif, u Myntri Foreign Affairs u Subrahmanyam Jaishankar, u Chief of Army Staff u Asim Munir bad u National Security Advisors Ajit Doval bad Asim Malik. Ka Sorkar India bad Pakistan ki la mynjur ban sangeh noh mardor ïa ka jingïasiat bad ban sdang ïa ki jingïakren halor ki mat ba kongsan ha ka jaka ba khlem liang. Ngi ai jingïaroh ïa ki Myntri Rangbahduh u Modi bad u Sharif halor ka jingstad bad ka jinglong nongsynshar jong ki ha kaba jied ïa ka lynti jong ka jingsuk,” la thoh u Mr Rubio ha ka rynsan X.
