Shillong, ‘Naitung 22: Ki Pulit ka Mawkyrwat da ka jingïarap jong ki Pulit ka Byrnihat Out Post kiba la pynlong ïa ka jingtohkit kaba bniah bad ka jingthwet kaba jur hadien saw snem, kata, ha ka 20 tarik mynta u bnai ki la ïoh kem ïa uwei u briew uba la suba ba u dei uba donkti ha kaba leh be-ijot bad pynïap beiñ ïa iwei i heprit ba dang 12 snem ka rta.
Ha u kyrwoh ba la phah da u Superintendent of Police ka South West Khasi Hills District ha ka sngi Baar u la pyntip ba ha ka 6 tarik, Lber, 2021, iwei i heprit kynthei ba dang 12 snem ka rta i la jah rngai na la iingsah ha ka shnong Borsora ha ka por kumba 5:00 baje janmiet.
Ha ka sngi kaba bud la lap ïa ka met jong i bad ha ka jingleh ïa ka postmortem la hsem ba i la shah leh be-ijot shwa ban shah pynïap.
Uwei u briew ba la suba donkti uba la tip kyrteng kum u Modu Sangma u la phet rieh bad ym shym la lah satia ban lapdien ïa u.
Ka Investigating Officer (IO) kaba la buddien ïa kane ka case ka lah ban lap ïa ka jaka riehtngen jong u nongleh kam bymman ha Byrnihat, Bhoi District.
“Da ka jingïarap jong ki Pulit ka Byrnihat Out Post, la kem ïa u nongphetrieh bad la wanrah ïa u sha Mawkyrwat Police Station,” la pyntip u SP.
“La kem noh ïa u bad la pynlong shuh shuh ïa ka jingtohkit kaba bniah,” u la ong.
