Shillong, Nailar 19: Ka Dorbar Shnong Lum Shyiap ka la pynkhreh ban mudui da ka ejahar pyrshah ïa ka Kong Saralin Kharlukhi kaba dei ka nongsam khaw reshon (Fair Price Shop) hadien ba kam shym la pynpoi satia ïa u khaw shapoh ka shnong wat hadien ba ladep sei na kudam ka FCI.
Kane ka jingbym poi jong u khaw shapoh ka shnong ka la buh jingeh ïa ki paidbah nongshong shnong kiba duna ha ka ïoh ka kot kiba ju bam ïa u khaw reshon namarba ki la hap ban shu shim ram tang ban pynbit pynbiang ha iing ha sem.
Halor kane ka jingeh, ki paidbah nongbam khaw reshon ki la pyntip sha ki bor pynïaid shnong bad ka Dorbar Shnong ruh marmar ka la shimkhia halor kane ka jingeh ha kaba la pyntip ruh ha u bnai Jylliew, 2024 sha SC Sadhu mynba u dang long u Deputy Commissioner jong ka East Khasi Hills District.
Katkum ka jingïathuh jong ki paidbah, mynta la kumba 3 ne 4 bnai kim shym la ïoh shuh ïa u khaw reshon bad ki la pynpaw ruh ba kim kwah shuh ba ka Kong Sara kan dang bat kum ka nongsam khaw ban pynpoi ïa u khaw reshon hapoh ka shnong.
Katkum ka jubab RTI la lap ba ïa u khaw ladep ban sei bad ban kit lut baroh na kudam jong ka FCI katba u khaw pat um shym la poi satia bad kane ka la pynlyngngoh ruh wat ïa ka dorbar shnong ïa ka baroh kawei.
U Rangbah Shnong ka Lum Shyiap u Bah A. Khongphai ha ka jingïakren bad ka Batesi TV u la ong, “ngi la ïaishah baroh shikatta, hynrei wat hadien ba la aipor ban sam noh ïa u khaw ruh kam shym la leh satia. Mynta ngi la pynkhreh da ka ejahar ban ujor na ka liang jong ka shnong.”
“Wat hadien ba la shimti i Kong RM Kurbah kum ka Deputy Commissioner ruh ngim ïohi satia ba kan don kano kano ka jingshimkhia pyrshah ïa ka nongsam khaw,” la ong u Bah Khongphai bad bynrap, “nalor ba ka DC ka la phah da ka show cause notice ruh hynrei ka nongsam khaw kam shym la jubab.”
