Indore, Jylliew, 10: Ki Pulit ka Meghalaya ryngkat bad ki Pulit ka Crime Branch, Indore, Madhya Pradesh ha ka sngi Baar ki la khynra ïa ka ïingsah jong u Vishal Chauhan bad ïoh kurup ruh ïa ki sopti ba u phong ha ka sngi ba u pynïap ia u Raja Raghuvanshi ha Sohra.
U Vishal Chauhan u dei uwei napdeng ki saw ngut kiba donkti ban pynïap ïa u Raja Raghuvanshi katba u dang leit kai ‘honeymoon’ bad la ka kurim jong u, ka Sonam sha Sohra, Meghalaya.
U ACP ka Indore Crime Branch u Poonamchand Yadav u la pynthikna ïa kane ba ki Pulit ki la ïoh kurup ïa ka sopti kaba u Chauhan u la phong ha ka sngi ba u don ha nongbah Shillong.
“Ki la kubur bad ki la phla ba ki la leh ïa ka kam pynïap briew. Ngi dang wad mynta sa ïa ka mobile jong u,” ong u Yadav bad ïathuh ba u Chauhan u la phla ba u dei uba donkti ha ka jingpynïap.
Kane ka jingjia ka la pynkyndit haduh katta katta ïa ki nongshong shnong kiba ithuh bha ïa u Chauhan.
Ka Vimla Patel, ka trai iing jong uwei pat uba la shah suba donkti lang ïa uba la tip kyrteng kum u Anand Kurmi, ka la pynpaw ïa ka jingbym sngew lah ngeit halor kane ka jingshah kynnoh ba u nongtrei uba shakri la kumba san ne hynriew snem eiei.
“U ju trei kum u nongbylla,” ong ka Patel sha ki lad pathai khubor. Ka la ïathuh ba u Kurmi uba dei ka shnong trai na Bina, u la mih ban leit jinglet kumba 20-25 sngi mynshwa.
U Additional Deputy Commissioner of Police (Crime) u Rajesh Dandotiya u la pynthikna ba baroh saw ngut ki nongleh kam bymman, u Akash Rajput, u Vishal Singh Chauhan, u Raj Singh Kushwaha bad u Anand Kurmi ki don mynta ha thanat jong ka Indore Police Commissionerate.
Ïa kine kiba shah suba leh kam bymman yn sa wan rah sha Shillong tang shu pyndep ïa ki kyndon katkum ka aiñ.
Ïa u Raj Kushwaha, u Vishal Chauhan bad u Akash Rajput ki Pulit ka Meghalaya ki la ïohbor na ka Kashari ban tohkit na ka bynta hynñiew sngi.
“Ki Pulit ka Shillong kin sa tohkit ïa ki. Ïa ki lai ngut la kit noh hynnin ka sngi. Mynta ka sngi, sa uwei u nongleh kam bymman la ïohkem,” la ong u Dandotiya.
Kine ki saw ngut ki la shah kem halor ka jingkynnoh ba ki dei kiba donkti ban pynïap ïa u Raja Raghuvanshi ba la ai wai da ka tnga shukor jong u ka Sonam Raghuvanshi.
Ki shijur kiba dei ki nongshong shnong jong ka Indore, Madhya Pradesh ki la wan sha Meghalaya na ka bynta ka ‘honeymoon’ hynrei ha ka step 23 tarik Jymmang, 2025 la lap ba ki la ja rngai.
Ïa ka met ba la lam pyut jong u Raja Raghuvanshi la lap ha ka 2 tarik Jylliew,2025 na Mot Arliang kaba don hajan Wei Sawdong Sohra.
Ki Pulit ka Meghalaya ki la leit sha Uttar Pradesh ban shimti ïa ka Sonam Raghuvanshi hadien ba ka la pyntip sha ki bahaiing ba ka don hajan kawei ka dukan bam harud surokbah Varanasi-Ghazipur ha Uttar Pradesh. Ki Pulit kiba la leit shimti ïa ka, ki la ïalam sha Women’s Support Centre kaba don ha Ghazipur shwa ban rah ïa ka sha Phulwari Sarif Police Station, Patna, Bihar.
