Shillong, Jylliew, 16: U Chief Executive Member (CEM) barim ka Khasi Hills Autonomous District Council (KHADC) Bah Pynïaid Sing Syiem ha ka Lah Sngi u Blei u la khap ribon ban aiti ïa ka School Bos kaba u la pynïoh ïa ka Dinet Manik Syiem Memorial Higher Secondary School, Nongthymmai lyngba ka Chief Minister Development Fund (CMSDF) jong u snem 2025-2026 ha ka jinglut kaba kot 29 lak tam.
Hadien ba ladep ban khap ïa u ribon, u Bah Pynïaid u la aiti ïa u shabi jong ka School Bos ha ka Principal jong ka skul ka Kong D. Kharkongor ha kaba la sakhi lang ki nonghikai, ki khynnah skul bad katto katne ki nongïalam jong ka NPP Nongthymmai Constituency.
Ka jingaiti ïa kane ka School Bus ka long khnang ba ki bor pynïaid skul kin dup ïohlad ban pyndonkam ha kaba leit shaw bad leit on ïa ki khynnah pule jong ka skul bad ha kino kino ki kam kiba ïadei bad ki kam jong ka skul.
