Shillong, Nailar, 13: U Myntri Rangbah ka jylla u Conrad K Sangma ha ka sngi Balang u la pynbna ïa ka rai jong ka Sorkar ban ai jingkyrshan pisa sha ki nongdie madan kiba la rejistar ha kiwei pat ki ïew sor ha ka jylla lyngba ka CM Urban Livelihood Grant Scheme (CMULGS).
Ïa ka song pisa ba ai jingïarap tang shisien ai kaba kot T.10,000 la sam sha ki nongdie madan kiba la pynrung kyrteng bad ka Hima Mylliem ha ka prokram buh mawnongrim ïa ka projek ban pynitynnad ïa ka Ïewduh ha ka wat kaba ar.
Haba kren ha kane ka sngi, u Sangma u la ong ba ka jingthmu ba hakhmat eh jong kane ka skhim ka long ban ai jingkyrshan ïa ki nongdie madan ha surok, da kaba kubur ïa ka jingdonkam jong ki ha ka ïoh ka kot ha sor.
Da kaba ai jingïarap pisa ka Sorkar ka thmu ban kyntiew ïa ka jingim jong ki nongdie madan, u la ong.
“Kam da dei eh shaphang ka pisa ne tang ka skhim kaba ngi ai, nga ngeit ba ka khubor kaba kham sngewtynnat ka dei shaphang ka burom. Ka dei shaphang ka jingshisha ba ka Sorkar ka kwah ban ïathuh ïa phi ba kaei kaba phi leh ruh ka dei kaei kaei kaba kongsan bha, kaei kaba phi leh mynta ka sngi ka long ba ka kamai kajih jong phi na ka bynta ka iing ka sem jong phi bad ka burom jong phi ka don ryngkat bad phi bad ka jingsngewrit. Ka khubor ka long ba ka Sorkar ka don ryngkat bad phi bad ka ieng ryngkat bad phi la ka long ka jingai kaba rit hynrei phin dup lah ban pynheh ïa ka kamai kajih jong phi nangne shakhmat,” ong u Myntri Rangbah.
U Sangma u la pynbna ruh ba ka Sorkar ka thmu ban pynïar ïa kane ka prokram sha kiwei pat ki ïew sor ha ka jylla.
“Suki suki katba ngi nang ïaid shakhmat ngin sa pynrung ïa kiwei pat ki ïew sor, kane ka long na ka bynta baroh ki Urban Municipal Area ha kylleng ka jylla, lano lano ruh haba don ki jaka ïew, ka jingmut jong ngi ka long ban ïarap ïa ki nongdie madan harud surok bad ban kyrshan ïa ki ha ka liang ka pisa lane da kano kano ka lad ba ka Sorkar ka lah. Katba ngi nang jam shakhmat nga kyrmen ba ngin sa lah ban ïarap bad kyrshan ïa phi ha kiba bun kiwei pat ki liang ha ki sngi ban wan,” la bynarap u Sangma.
Katkum ka jingong jong u, ïa ka pisa jingïarap yn sa siew beit beit sha ka Bank Account jong ki nongdie madan, ban pynthikna ïa ka jingkhuid jingsuba bad ka jingtreikam ba paka.
U la ong ba wat ki nongdie madan ki bym pat pynrung kyrteng ki lah ban pynrung kyrteng noh ban ïoh ïa ki jingmyntoi na ka skhim.
U Myntri Rangbah u la kular ruh ba ka jingpynrung kyrteng kam mut ban pyrkhing ïa ka die ka thied hynrei kan long na ka bynta ka jingpynïaid kaba kham bha.
