Shillong, Lber, 17: Ka tnat Pule Puthi jong ka Sorkar Jylla kaba la ïoh jingtip halor ka jingkhladnoh jong u heprit uba dang 13 snem ka rta uba pule ïa ka Class-VI ha kawei ka Residential School jong ka Gokul Educational Institution ha ka shnong T. Kagepura, Mandya District jong ka jylla Karnataka, ka tnat Pule Puthi jong ka Sorkar Meghalaya ka la thaw ïa ka kynhun bakyrpang kaba kynthup ïa ki ophisar ïa kiba la phah ban pynlong ïa ka jingtohkit kaba bniah sha ka jylla Karnakata. Kane ka kynhun kan ïatreilang bad ki bor synshar District bad kin ai jingpyntip ruh sha ki kmie ki kpa jong ki khynnah kiba dei na ka jylla Meghalaya.
Ki arngut ki ophisar ba kynthup ïa u Sub-Inspector of School na ka Sub Divisional School Education Officer, Shillong u Bah P. Sun bad ïa u District MIS, PM–POSHAN, Shillong u Bah R. Kharsyntiew kin sa leit sha ka jylla Karnata ban pynlong ïa ka jingtohkikt kaba bniah halor kine ki jingjia.
Ha u kyrwoh ba la phah da u Secretary jong ka tnat Pule Puthi ka Sorkar Jylla, u la pyntip ba ka Gokul Educational Institution ka don baroh 202 ngut ki khynnah bad 23 ngut ki dei na ka jylla Meghalaya bad kiba sah ha ka Hostel ba la jia ka jingkem pang jong ki khynnah bad uwei pat u heprit u la duhei ïa ka jingim tang na ka daw ba ki la bam ïa ka jingbam ba long bih.
U kyrwoh u la pyntip shuh shuh ba ïa ki khynnah la pynkit lut sha hospital da ki bor synshar district bad ka tnat Pule Puthi ka dang ïai bteng ban ïatreilang bad u District Magistrate jong ka Mandya District uba la ai ka jingkular ban ai jingkyrshan pura halor kane ka jingjia.
Uwei na ki khynnah uba dang don mynta hapdeng ka jingshitom kaba jur la phah sumar noh sha ka hospital kaba kham bha. Shuh shuh u kyrwoh u la pyntip ba baroh ki khynnah kiba la ïoh jingsumar ki la don hapdeng ka met kaba koit ba khiah bad ki bor synshar district ki la buh ruh ïa ki Nodal Officer ban pynthikna ba baroh ki khynnah ba la kem pang ki dei ban ïoh ïa ka jingsumar kaba biang.
Hangne yn pyni ruh ïa ki kyrteng jong ki khynnah kiba pule ha Gokul Educational Institution kiba dei na kane ka jylla Meghalaya ïa kaba la ai jingtip da ka tnat Pule Puthi jong ka Sorkar Meghalaya.
