Shillong, Nailar, 07: Ka Sorkar Jylla ka la pynkhreh ban wallam noh da ka aiñ kaba thymmai na ka bynta ban ïakhun ïa ka jingrung kyrthlep ki mynder sha ka jylla, hadien ba ka la don ka jingeh haba ïadei bad ka jingpyntreikam ïa ka Meghalaya Residents Safety and Security Act (MRSSA).
Haba kren bad ki lad pathai khubor, u Myntri Rangbah ka Jylla Conrad K Sangma u la ong ba ka sorkar jylla ka la pynkhreh ban wanrah da ka aiñ kaba kham khlaiñ kaban peitngor ïa kane ka ishu da kaba buh hakhmat ïa ka jingshongsuk shongshngaiñ hadien ba ka la don ka jingjïa ha ka jylla Assam bad Bangladesh.
“Haba ïadei bad ka ishu ban peitngor ïa ka jinglong jingman baroh khamtam haba ïadei bad ka jingwan jong ki briew shapoh ka jylla bad kumjuh kiba mih shabar ka jylla, kadei ka mat kaba sngewkhia khamtam haba peit ïa ka jinglong jingman kaba la jia ha Assam bad kaei kaba jia ha Bangladesh. Kumta lada phi peit lut ia baroh ka jinglong jingman sawdong, ka long kaba donkam pat ban don da ka kyndon kaba kham khlaiñ shuh shuh,” ong u Myntri Rangbah ha kane ka sngi Palei.
U Myntri Rangbah u la ïathuh ruh ba ka sorkar jylla kan sa shong pyrkhat bad syllok bad baroh ha shwa ba kan pyntip lut sha ki paidbah halor kane ka bynta.
“Ngi la kynduh katto katne ki jingeh haba ïadei bad ka MRSSA. Kumta, da kaba peit na ki jingïakren kiba la dep bad ka Law Department bad kiwei kiwei ki riewshimet bad khamtam ka jingsyllok bad ki Myntri ba la kham shemphang kumjuh ki heh sorkar, mynta ngi la don ha ka kam ban pynkhreh. Nga sngew ruh ba ka dang kloi than ban ong ei ei ne ïathuh bniah halor kane. Tangba ngin hap ban ïa syllok bad kiba bun ha shwa ba ngin pyntip pat sha ki paidbah,” u la ong.
Nangta, u Myntri Rangbah u la ïathuh ba u la pyntip ruh ïa u Myntri ka tnad Kampohiing ka Jylla shaphang ki kam khappud ka Assam bad Meghalaya bad kumjuh haba ïadei bad ka khappud India – Bangladesh da kaba pyntip ïa ka jingdonkam ka jingshngaiñ jong ka Ri.
“Nga la dep ban pyntip ïa u Myntri ka tnad Kampohiing baroh halor kine. Haba ïadei bad ka jingshong shngaiñ, u la dep ïoh ïa ka jingtip na ki tnad syntiat hynrei kum u Myntri Rangbah ka dei ka kamram jong nga ban pyntip sha u shaphang ki kam kiba ïadei bad ki lad ki lynti ban pyntikna ïa ka jingshngaiñ hapoh ka ri bad ruh ïa kiei kiba jia ha ki khappud jong ka India bad Bangladesh,” u la ong.
