Shillong, Jylliew, 06: Ka BJP Mahila Morcha ka la dawa ïa ka Sorkar Jylla ban pynbha ïa ki jingai jingsumar sha ki nongpang kiba wan na ki longiing kiba kham duna ka ïoh ka kot ha ki shlem ai jingsumar ba la pynïaid da ka Sorkar.
“Ka jingïap jong ka longkmie ba dang pun khun ha Civil Hospital, Jowai sa shisien ka la pynpaw shynna ïa ka jingtroiñ ki shlem ai jingsumar ha ka jylla. Katba kito kiba don ka ïoh ka kot kaba heh ki lah ban ïoh ïa ki jingsumar kiba bha tam, hynrei briew kiba wan na ki longiing ba duna ka ïoh ka kot ki hap ban ap ïa ka jingsngewsynei ha ki rukom treikam ba khlem pyrkhat bad bym biang ki tiar ai jingsumar. Kane ka buh ïa ka Meghalaya ha ka jingma kaba khraw,” ong ka President jong ka BJP Mahila Morcha ka Kong Susuki Pariat ha u kyrwoh.
“Ngi kyntu ïa ka Sorkar Jylla ba kan shimkhia mardor da kaba pynbha ïa ki jingai jingsumar ha ki hospital sorkar khnang ban lait na kum kine ki jingjia ba sngewsih. Ki nongshong shnong jong ka jylla ki dei ruh ban shim kabu ïa ka skhim Ayush jong ka Sorkar Pdeng khnang ba kin ïoh ïa ki jingsumar kiba paka tam ha ka dor kaba rem.”
“Ngi la ïakynduh ïa ka dkhot jong ka National Commission for Women ka Kong Delina Khongdup bad pyntip ruh halor kane ka jingjia. Ka la kyrpad ïa ki bor ba dei peit ban jurip ïa kawei pa kawei ka jaka ai jingsumar na ka por sha ka por,” ong u kyrwoh.
