Shillong, Nailur, 05: Phra ngut ki samla kiba la im lali bad im kyrni ha ka jingshah teh mraw ha u drok, mynta ka kynti ki la rai kut ban pynbeit noh ïa la ka jong ka jingim lyngba ka jingïarap jong ka Hynñiewtrep Youths Council (HYC) kaba la ïalam lynti ïa kine ki samla ban pynthymmai biang ïa la ka jingim.
Kine ki phra ngut ki samla ba la synran lang da ki bahaing hasem ki jong ki, ha ka miet sngi Balang ki la mih na ka ophis treikam jong ka HYC ban leit shah sumar ha ka Alive Again Foundation Rehabilitation Centre kaba don ha ka jylla Assam.
U Vice President jong ka HYC Bah Donboklang Kharlyngdoh ha ka jingïakren bad ki lad pathai khubor u la kyrpad ïa ki kmie ki kpa haba ki la phah ïa la ki khun sha ka Rehabilitation Centre ki dei ban long kiba ïaishah bad ym tangba katto katne bnai kin leit shaw noh ïa ki hynrei ki dei ban da ailad ïa la ki jong ki khun ba kin da phrang shwa ïa la ka jong ka jingim tad haduh ba kin wan phai biang sha la ing kum ki briew kiba la sloit noh ïa ka jingim kaba rim.
Haba kylli halor ka jinglut jingsep u Bah Kharlyngdoh, u la ong, “ka jinglut jingsep na ka bynta ka bai shah sumar ha ka Rehabilitation Centre, na ki 100 tam ki khynnah kiba ka seng ka la phah, 80 haduh 90 percent ki dei kiba ka HYC hi ka la bei jingïarap bad kumjuh ruh na ka Rehabilitation Centre.”
Kat haduh mynta ki la don palat 100 ngut ki khynnah kiba la im kyrni bad kiba la shah teh mraw ha u drok kiba la kohnguh ïa ka jingbtin lynti jong ka HYC da ka jingmynjur jong ki bahaing hasem ban leit sumar ha Alive Again Foundation Rehabilitation Centre.
