Shillong, Jymmang, 23: U Nongïalam ka Liang Pyrshah Dr. Mukul Sangma ha ka sngi Thohdieng u la ong ba ka khappud jong ka ri India bad ka ri Bangladesh kam dei satia ban long kaba lait rynghang.
Da kaba pynpaw ïa ka jingsngewkhia halor ki bynta ba dang lait rynghang u pud u sam bad ka ri Bangladesh namar ka jinglong jingman ba mynta, u Dr. Mukul u la ong, “ïa kita la ju pynsngew sha ka Sorkar India. Na kane ka bynta, ngi sngew ba ka khappud jong ka ri kam dei satia ban shu lait rynghang.
Haba kdew ïa ka jingma ban ailad ïa ka jingkhaïi beaiñ kaba lah ban jia eiei ha khappud jong ka ri, u Myntri Rangbah barim u la ong, “ka long kaba ma bha ha kum kane ka por haba phi don ïa kane ka jait jingeh ha ka saiñ pyrthei. Dei na kata ka daw ba balei ki katto katne ki trok kiba kit kwai tyrkhong la lap da ki katto katne ki briew kynthup ruh ki lad pathai khubor. Ka dei ka kam kaba sngewkhia.”
U la ban jur ïa ka jingdonkam ban pyntip sha ka Sorkar India bad ong, “ka Sorkar India ka dei ban jingpynshitom kynthup ban bthah ïa ki Jylla ban leh eiei da kaba ïatreilang hapdeng ka Sorkar bad kiwei kiwei ki bor treikam.”
Haba kylli, u Dr. Mukul u la ong ba u sngew thikna ba ka Sorkar Jylla ka dei ban pynpaw ïa baroh ki jingeh hakhmat ka Sorkar Pdeng.
“Nga sngewskhem ba ka Sorkar India ka la peitngor ïa ka jinglong jingman baroh kawei bad ka jylla ka don tang ka jingkitkhlieh ban ïasam ïa ki jingtip bad ban ïasam ïa ki jingeh hynrei ha kaba kut ka jingkitkhlieh baroh kawei ban tem ïa kine ki mat kiba ïadei bad ka jingïakynad saiñpyrthei, ka jingïadei hapdeng ki ar tylli ki ri, ka shong beit ha ka Sorkar India,” u la bynrap shuh shuh.
