Shillong, Jylliew, 29: Arngut ki samla ki la mynsaw hadien ba ka kali Maruti Ignis kaba don ïa u nombar ML 05 W 7020 ka la kylla khongpong na ka jingïaleh Stunt hapdeng ki nongñiah thuk thuk ar shaka bad ki nongñiah kali saw shaka ha ka 29 tarik Jylliew, 2025 ha surokbah Umsning Bypass, Ribhoi District.
Katkum ka jingtip ba la ïohlum la ïathuh ba kane ka la jia ha ka por kumba 4:30 baje ha ka shnong Umkaliar ha kaba ki don saw ngut ki samla kiba dang don hapdeng ka rta 18 haduh 20 snem ki la wan da ka kali Maruti Ignis bad namar ka jingpynher sted jong u nongñiah u bym shym la lah shuh ban synshar ïa u lakam ka kali u la leit ban tynrah beit beit ïa u Divider jong ka surokbah kat haduh ba ka kali kaba ki shong ka la kylla kumba ar ne lai khongpong hapdeng surok.
Arngut kiba shong lang hapoh kane ka kali ki la phet krad bad iehnoh shadien ïa u nongñiah bad ïa uwei pat kiba la mynsaw jur
Ki Pulit ka Umsning Police Station kiba la jingtip halor kane ka jingjia ki la her mar mar sha kane ka jaka bad ïa ki arngut kiba la mynsaw la pynkit noh da ka kali Ambulance 108 sha Umsning CHC ban ïoh ïa ka jingsumar bad ka jingtohkit halor kane ka dang ïaid shakhmat.
