Shillong, Jylliew, 30: Ki bar jylla ki la mih lut na ka shnong Erpakon hadien ka jingshah pynïap jong u Bah Kyrmen Lyngdoh Nonglait. Kane ka jingpyndem jong ki bar jylla, ka long hadien ba Dorbar Shnong baroh kawei ka la rai ban ym shah shuh ïa ki bar jylla ba shong ban sah ne seng kam seng jam hapoh ka jylli jong ka shnong Erpakon, ka shnong kaba don ha Ribhoi District.
Kum ban shu pynkynmaw, ka Dorbar Shnong Erpakon ka la rai ban ym shah shuh ïa ki bar jylla ban shong ban sah ne ban sengkam sengjam hadien ba u Bah Kyrmen Lyngdoh Nonglait u la duh noh ïa la ka jong ka jingim hadien ka jingshah tangon da ka kynja lyntang ha ka 11 tarik, Jymmang 2024, ha uwei na u nongtrei ka R.N Sharma Hotel ïa uba la tip kyrteng kum u Raju Rajbhar
Ïa u Raju la kem da ki Pulit jong ka Ri Bhoi halor kane ka jingjia.
Ha ka jingïakren bad ki lad pathai khubor ha ka sngi Saitjaiñ, u Rangbah Shnong ka Erpakon Bah M. Thongni bad u Secretary Shnong Bah Lambor Kharshilot ryngkat ka jingdonlang jong ki nongïalam shnong ki la ïathuh ba ki ladep ban pynmih da ka hukum naduh ka 21 tarik, Jymmang 2024 ban kyrpad ïa baroh ki bar jylla kiba shong ba sah hapoh ka shnong bad khamtam kiba trei ha R.N Sharma Hotel ba ki dei ban mih noh mardor namar ka shnong ka la pynbna ba kam kam don shuh ka jingbah khlieh.
Ka Dorbar Shnong ha ka sngi Saitjaiñ ka la lum biang ïa ka Dorbar Pyllun ha ka shnong Erpakon ha ka jingdon lang jong ki trai ba aiwai ïa ka RN Sharma Hotel.
Ki la pynpaw ruh ba ka Dorbar Shnong ka dap da ka jingsngewkmen ba ka jingïalang ka la long kaba seisoh hadien ba ki bar jylla ki la mih noh hapoh ka shnong bad hadien ba ki bar jylla ba shongwai ha RN Sharma Hotel ki la mih lut napoh shnong naduh ka 13 tarik Jylliew. ïa kane ka la pyntip da ki trai jaka bad ki la pynpaw ruh ka jingkmen ba ha kane ka shnong mynta la don satang para Khasi.
Kum ka shnong ka la ai khublei ruh ïa ki paidbah, ki kynhun sengbhalang kiba ai ka jingkyrshan ïa ka shnong bad ki la pypaw ruh kum kine ki jingjia kim dei shuh ban dang jia kaba ktah ïa ka shonguk shongsaiñ jong ki paidbah hapoh ka shnong.
