Shillong, K’lyngkot, 04: Ki Pulit ka Anti Narcotic Task Force (ANTF) Meghalaya kiba la ïoh ïa ka jingtip kaba bniah na ki tnat syntiat ha ka jingpynap shrip harud ka surokbah Shillong-Guwahati ha ka shnong Mawiongrim, Shillong ha ka sngi Balang ha ka por kumba 2:00 baje nohphai sngi ki la ïoh bat ïa kawei ka kali Etios kaba don ïa u nombar MLO5 M 6379 kaba shong tang arngut ki shijur kaba dang wan na Ribhoi District.
Kine ki shijur ki dei kiba la tip kyrteng kum u Dawansalanmi Marbañiang, 24 snem uba sah ha Mawlai Mawtawar bad ka Bandarihun Kharbani, 28 snem kaba sah ha ka shnong Nongmensong, Shillong.
Ha ka jingtalasi ïa ka kali, ki Pulit ki la lap ïa kawei ka pla ba la thep ïa ki thyrnia injekshon bad 11 tylli ki tyndong ba la thep ïa u drok uba khia 1.23 gram bad na ka met jong u Dawansalanmi ki Pulit ki la lap sa lai tylli ki thyrnia injekshon.
Ka Bandarihun ka la phla ha ki Pulit ba ka la leit thied ïa u drok ar tyndong na Byrnihat ha ka dor T. 1500 tyngka namarba u kham tad dor katba ha Shillong u kham remdor.
Ka la phla ba ma ka bad u Dawansalanmi uba ka kam ba u dei u tnga uba rim ki la mih na Shillong ha ka por 11:00 baje mynstep ban leit thied ïa u drok na Byrnihat da kaba kam ba u dei uba ki dih hi tang ïalade.
Ki Pulit ki la rah noh ïa kine ki shijur sha thanat ban pynlong shuh shuh ïa ka jingtohkit kaba bniah.
