Shillong, Nailar, 19: Ka Myntri ka Koit ka Khiah ka Dr. Ampareen Lyngdoh ka la pyntip ba ka jylla Meghalaya ka la nang sakhi ïa ka jingduna ka jingïap jong ki longkmie ba dang armet bad ki khunlung ha ka por ba dang kha.
Ka Dr. Ampareen ka la ai burom ïa ka jingthmu jong u Myntri Rangbah ka Jylla, ba la tip kum ka “Save Motherhood Scheme,” kaba la don bynta kaba kongsan ha kane ka jingkylla.
Kane ka skhim ka pynleit jingmut ban pynthikna ba manla ki Primary Health Centre (PHC) bad ki Sub-centre ba la pynkha khun ki long kiba shngaiñ bad kiba pynleit jingmut ha ka jingsumar ïa ki khynnah.
Haba pynpaw ïa ka Convergence Model, kaba pynïasoh lang ïa ki tnad bapher bapher, kynthup ïa ka pule puthi, ka tnat social welfare, bad ka koit ka khiah ban buh hakhmat eh ïa ka jingbam teimet jong ki khynnah, ka Dr. Ampareen ka la ong ba kane ka jingpyrshang hapdeng ki tnad ka thmu ban pynthikna ba ka jingbam teimet jong ki khynnah ka long kaba hakhmat eh ha manla ki district bad ki block.
Ka la pyntip ruh ba ka jylla ka dang sdang ïa ka prokram “Mother Care”, kaba thmu ban pynsngewthuh shaphang ka jingdonkam ban pynpynjlan khun bad ban pynthikna ba ki longkmie kin long kiba khlaiñ bad kiba koit bakhiah shwa ban kha ïa ki khun kiba bud.
Ïa kane ka prokram yn pyntreikam lyngba ki prokram pynsngewthuh ryngkat ka jingïarap jong ki nongtrei ka koit ka khiah, ki ASHA, bad ki nongtrei Anganwadi.
Ha kaba ïadei bad ka jingpynjlan khun, ka Myntri ka la banjur ba ka jylla kan ym pynjari ïa kino kino ki kyndon kiba ïaid pyrshah ïa ka riti dustur bad ki rukom ngeit tynrai jong ka imlang sahlang.
“Ha ka jaka jong kata, ka jingpyrkhat kan long ban hikai ïa ki longïing bad ki longkmie shaphang ka jingdonkam ban pynpynjlan khun bad ban pynthikna ba ki kmie ki dei ban long kiba koit ba khiah bad kin khlaiñ shwa ban kha ïa ki khun kiba hadien,” ka la pynpaw.
Ka la pyntip ruh ba ka jingwad bniah ka la pyni ba ka multi-gravida (ka jingarmet kham kloi) ka dei ka daw bah jong ka jingkha khun kaba don jingma ha ka jylla.
“Ka sorkar kan pyndonkam ïa kane ka jingwad bniah ban pynmih ïa ka jingsngewthuh bad ban kyntiew ïa ki rukom treikam kiba koit ba khiah hapdeng ki longiing bad ki longkmie,” ka la ong.
“Ngi kyrmen ba kane kan long ka nuksa kaba wat ka Sorkar India ruh ka lah ban peit, ngi dei ka jaitbynriew kaba rit bha bad ban kha khun tang khyndiat ne ban pynduh khun ka long kaba bakla hynrei em ngi kheiñ kor ïa ka koit ka khiah jong ki longkmie,” bynrap biang ka Myntri.
