Shillong, K’lyngkot, 12: U Myntri Rangbah ka Jylla u Conrad K. Sangma ryngkat bad ka Myntri ka Koit ka Khiah ka Dr. Ampareen Lyngdoh katba ki dang wan phai na Sohra sha Shillong ha ka step sngi U Blei ynda poi ha ka shnong Mawkdok ki la lap ïa ki arngut ki nongjngohkai pyrthei na ka jylla Assam kiba la mynsaw ha ka jingaksiden kali.
Kine ki arngut ki nongjngohkai pyrthei ki la shu mynsaw malu mala hadien ba ka kali kaba ki shong ka la kylla khongpong.
U Myntri Rangbah bad ka Myntri ka Koit ka Khiah tang shu lap ïa kane ka jingjia ki la hiar na kali ban leit tohkit bad ban ai jingïarap ïa kine ki arngut ki lanot.
U doktor uba bud ïa u Myntri Rangbah u la ai jingsumar ïa ki lanot bad ki Pulit kiba synran ïa u Myntri Rangbah mar mar ki la phah wan ïa ka Ambulance na Sohra ban ïarap pynkit ïa kine ki arngut ki lanot sha Hospital.
