Khliehriat, Risaw, 01: Ki pulit jong ka Khliehriat Police Station bad ka kynhun Anti Narcotic Task Force (ANTF) jong ka East Jaiñtia Hills District ba la lamkhmat da u Addl. Superintendent of Police (ASP) u Bah Banraplang Jyrwa ha ka sngi Saitjaiñ ki la ïoh kurup shibun ki dawai jyrhoh kiba bun jait ba la khaïi be-aiñ da ki snar khaïi drok. Ki Pulit ki la ïoh kurup ruh ïa ki mashin shna drok. Arngut kiba donkti ban khaïi be-aiñ ïa kine ki dawai ki la shah kem ha ki Pulit.
U Superintendent of Police ka East Jaiñtia Hils u Jagpal Singh Dhanoa ha u kyrwoh ba la phah sha ki lad pathai khubor ha ka sngi U Blei u la ïathuh, ki Pulit ki la ïoh ïa ka jingtip kaba tikna bha na ki tnat syntiat ba u don uwei u briew uba la tip kyrteng kum u Altaf Hussain, u la ïoh pdiang ïa u drok kiba dei ki dawai bad u la buhrieh ïa kine ki dawai ha kawei ka kudam buh tiar jong u kaba don ha Dkhiah, East Jaiñtia Hills District.
Mar mar ki Pulit jong ka Khliehriat Police Station ryngkat bad ki Pulit ka ANTF East Jaiñtia Hills District ki la pynlong ka jingkhynra bad ïoh bat ïa u Hussain.
Ha ka jingtohkit, u Altaf Hussain u la ïalam ïa ki Pulit sha ka kudam buh tiar jong u bad na kane ka kudam ki Pulit ki la ïoh kurup haduh 9883 tylli ki bilor dawai jyrhoh Phensedyl. Da ka jingphla jong u Hussain, ki Pulit ka Khliehriat Police Station ryngkat ka jingïatreilang bad ki Pulit ANTF, West Jaiñtia Hills ki la ïoh kem sa ïa uwei uba la tip kyrteng kum u Ratan Dkhar uba la phla ruh ba u don kawei ka karkhana barit ha ka ïing jong u ha Ummulong bad ha kane ka karkhana barit la khleh ïa ki dawai bad la ju shalan beaiñ sha ka ri Bangladesh.
Na ka iing sah jong u Ratan Dkhar, ki Pulit ki la ïoh ban kurup shuh shuh sa 600 tylli ki bilor dawai jyrhoh Elcodyl kiba don 100 ml ha uwei u bilor, 10 tylli ki bilor dawai Flavouring Agent kiba don 500 ml ha uwei u bilor, 11 bilor ki dawai ba la ai rong lane ki Food Colour kiba don 1 kilo ha uwei u bilor, 10 kilo ka dawai Diphenhydramine Hydrochloride (ingredient of Phensedyl), 1 kilo ka dawai Chlorphenirame Maleato (ingredient of Phensedyl), 7 tylli ki kot ba buh jingthoh (books on Pharmacology and Drug preparations), 34 tylli ki bilor dawai Phensedyl kiba don 100ml ha uwei u bilor bad 780 tylli ki bilor ba 100 ml, kiba thylli ban thep ïa ka dawai Phensedyl.
Nalor kine ki dawai beaiñ ba la ïoh kurup, ki Pulit ki la ïoh ban kurup shuh shuh sa 46 tylli ki synduk kot ba la thep ïa ki dawai Phensedyl, shi synduk kot ki jingtap bilor, shi plastik ka dawai Phensedyl, kawei ka Bottling Machine ban khleh dawai, ar tylli ki Machine tylliat lane ki Sophisticated Machine na ka bynta ban shna ïa ki dawai. Ki Pulit ki la ïoh kurup ruh sa ïa ka pisa kaba T. 11, 790 hajar.
Ha ka jingtohkit jong ki Pulit u Ratan Dkhar, u la phla shuh shuh ba dang doh sa ar ngut ki briew na ka jylla Assam kiba donkti ha kane ka kam khaïi dawai beaiñ, u Altaf Hussain, 32 snem ka rta, na ka shnong Badarpur, Karimganj Assam bad u Shahin Rahman, 32 snem ka rta na ka shnong Lathimara, Katogorah, Assam kiba ju ïarap ban pynpoi beaiñ ïa ki dawai jyrhoh.
Ki Pulit i la kem noh ïa kine ki ar ngut lem bad u Ratan Dkhar uba na ka shnong Ummulong, West Jaiñtia Hills District, uba la ai ïa ka kyrteng jaka ba shna dawai ha Dkhiah, East Jaiñtia Hills District.
Ki Pulit ki la register case ha Khliehriat Police Station hapoh ki kyndon jong ka Section 22(c)/25/29 NDPS Act bad ka jingtohkit ka dang ïaid shakhmat ban lap dien shuh shuh ïa kiba donkti ha kane ka kam khaïi drok beaiñ.
