Shillong, Lber, 19: Ka met ba dang sah jong u heprit Namebantei Marwein uba la khladnoh ha ka jylla Karnataka ka la wan poi ha ka shnong Sohparu, West Khasi Hills District ha ka sngi Baar.
U heprit Namebantei Marwein uba la 12 snem ka rta uba dang pule ia ka Class-VII u dei u khun jong u Bah Tobarlin Nongsiej bad ka Kong Shimtisful Marwein uba pule ha Gokul Educational Institute, kaba don ha ka shnong T. Kagepua kaba hap hapoh ka Mandya District jong ka jylla Karnataka.
Ia ka met ba dang sah jong une u heprit u la wan kit na Karnataka sha Meghalaya hadien ba pyndep ia ki jingdonkam baroh.
Kum ban shu pyntip hangne, ki don 24 ngut ki khynnah na kane ka jylla Meghalaya kiba pule ha Gokul Educational Institute bad baroh ki la kem pang hadien ba ki la bam ia ka jingbam ba la sah ba la wanrah na ka jinglehniam Holi.
U Kñi jong u heprit Namebantei Marweiñ u Bah G. Marweiñ uba dei ruh u Secretary jong ka Shnong Sohparu West Khasi Hills District ha ka jingïakren bad ki lad pathai khubor u la ong ba u Namebantei u la don sha Karnataka la 2 snem ban pule.
U la ong ruh kumba long ïa kiwei ïa u pyrsa jong u ruh la ïalam da ka Leisynshar Cultural Society, Meghalaya ban phah pule ha Gokul Educational Institution kaba don hapoh ka shnong T. Kagepura, Mandya District, Karnataka bad bun kiba la pas bad don ruh kiba dang pule ha ka rta kaba dang 10 snem hapoh.
U Bah Marweiñ u la ïathuh ruh ba ka jingtip kaba ki ïoh na ki bor pynïaid Hospital na Karnataka la ong ba u Namebantei u la ïoh ïa ka jingpang prie bad pynhiar kat haduh ba un da khlad noh hynrei kum ka ïing ki shu hun bad pdiang ïa kaei kaba ladep jia. Ym tang kata u la ïathuh ruh ba ïa ka met jong u heprit Namebantei la wan kit da ka liengsuiñ naduh Karnataka haduh Guwahati ïa kaba la bah khlieh ia ka jinglut jingsep da ka Leisynshar Cultural Society Meghalaya katba na Guwahati tad haduh ban da poi sha la ing la shimti noh da ka iing ka sem.
Na ka liang jong ka ïing ki la pyntip ba ïa ka met ba dang sah jong u heprit Namebantei yn sa tep donburom ha ka 20 tarik, Lber, 2025 ha u lum jingtep jong ka Balang Seven Day Adventist, Sohparu (SDA) ha ka por 1:00 baje mynsngi.
