Shillong, Jymmang, 04: San ngut ki mynder Bangladeshi ki la shah kem ha ki shipai BSF ha ka sngi Saitjaiñ katba ki dang thmu ban jam be-aiñ sha u pud u sam jong ka ri India lyngba ka khappud.
Lyngba ka jingïoh jingtip na ki tnat syntiat, ki shipai BSF jong ka 193rd Battalion ki la pynlong ïa ka jingpynap shrip ha kaba ki la ïohkem ïa ki arngut ki mynder Bangladeshi kiba dei ki nongshong shnong jong ka Sunamganj District Bangladesh na khappud jong ka East Khasi Hills district. Kine ki arngut ki la phla ha ki shipai BSF ba ki la jam sha shiliang u pud u sam ban wan wad kam bylla sha ri India. Ïa kine ki arngut la aiti noh sha ki Pulit jong ka Dangar Out Post ban leh ïa kaba donkam katkum ki kyndon jong ka aiñ.
Ha kawei pat ka jingpynap shrip, ki shipai BSF jong ka 50th Battalion kiba la i suba ïa ka ïaid ka ieng ha khappud ki la ïoh bat ïa lai ngut ki mynder Bangladeshi kiba dei ki nongshong shnong jong ka Pabna, Sherpur bad ka Kishoreganj Districts jong ka ri Bangladesh.
Lyngba ka jingtohkit, kine ki lai ngut ki la phla ba ki la trei kum ki nongsuh jaiñ ha kawei ka karkhana suhjaiñ ha Ahmedabad, Gujarat.
Ïa kine ki lai ngut, la aiti noh sha ki Pulit jong ka Mahendraganj Police Station, West Garo Hills ban leh ïa kaba donkam katkum ki kyndon jong ka aiñ.
