Shillong, Nailar, 08: Da ki spah ngut ki nongtrei bar jylla ki bym don ïa ka Labour License kiba trei bylla ha ki Karkhana bad ki dukan bapher bapher jong ka shnong 13mer, Byrnihat, Ribhoi District ki la shah beh ha ki dkhot jong ka Federation of Khasi Jaintia and Garo People, Byrnihat Circle kiba la leit ban khynra ïa ki nongbylla bar jylla ki bym don ïa ka Labour License.
Ha kane ka jingkhynra ba la lamkhmat da u President jong ka FKJGP Byrnihat Circle u samla Kitborlang Suting la shem ba bun na ki nongbylla bar jylla kiba trei ha ki Karkhana bad ha ki dukan bapher bapher ha ka thain 13mer Byrnihat, kim don satia wat tang ïa ka Labour License.
Kane ka jingkhynra ïa ki nongbylla bar jylla ha kane ka thain ka long hadien ba ka Seng ka la ïoh jingtip ba ki don ki briew kiba nabar kiba la pyrshang ban bsuh khlieh ha Byrnihat ha ka dur jong ki nongbylla hadien ba ka Sorkar Assam ka la kyndang naphang dang shen ïa ki mynder ri na ka jylla Assam.
