Shillong, Nailur, 05: U Principal bad nongseng ïa ka KB Memorial Secondary School, East Jaiñtia Hills u Dr. Heipor Uni Bang, u la shah pynkup burom ha ka President ka ri India ka Droupadi Murmu da ka khusnam National Teachers’ Award 2025 ha ka sngi Thohdieng napdeng ki 45 ngut ki nonghikai na kylleng ka ri India.
Ka President Murmu ka la pynkup burom ïa ki nonghikai ha ka jingïalang kaba la long ha Vigyan Bhawan, New Delhi, ha ka jingrakhe ïa ka sngi kyrpang jong ki nonghikai ha ka ri baroh kawei.
Ka jingithuh ïa u Dr. Bang ka pyni ïa ka jingaiti jong u ha ka pule puthi, ka jingwad bniah ha kaba ïadei bad ka mariang, bad ka jingshakri ïa ka imlang sahlang. U riewstad uba la tbit bha ha ka jingpule, u la pyndep ïa ka jingpule PhD ha ka Environmental Management na ka William Carey University, Shillong halor ka phang, “Ki jingeh bad ki lad ki lynti jong ka jingpynkhuid ïa ki jaboh jabaiñ jong ka East Jaiñtia Hills District, Meghalaya.
U la thoh bun ki kot wadbniah, kynthup ïa kiba la pynmih ha ka International Journal of Research Education and Scientific Methods (2021) bad ka International Journal of Ecology and Environmental Science (2020). U la thoh ruh ïa ki kot pule ha ka ktien Khasi ba la hikai haduh ka klas IV bad u ju pynthymmai manla ka por ïa ki kot jingtip kyllum jong ka skul jong u ban kynthup ïa ki jingtip shaphang ki kam jong ka distrik bad ka jylla.
U Dr. Bang u la sdang ïa ka kam hikai ha u snem 2009 hadien ba u la pyndep ïa ka MSc ha ka Botany na ka North-Eastern Hill University (NEHU). U la hikai ha ka skul Little Flower Secondary School, Khliehriat bad ha Rymbai Presbyterian Higher Secondary School hashwa ban seng ïa ka KB Memorial Secondary School ha u snem 2013 ban pynbiang ïa ka jingdawa ha ka imlang sahlang ban ïoh ïa ka skul phareng kaba jem dor.
Hapoh ka jingïalam jong u, ka skul ka la kiew ha ka pule puthi, ki kam ïalehkai bad ki kam kiba ïadei bad ka kolshor, da kaba wan ba ar ha ka State Subroto Mukherjee Cup (Uder-14 Boys) ha u snem 2023 bad 2025 bad ka la wan ha ki kyrdan ba hakhmat eh ha ki jingïakob ha ka kyrdan distrik, kynthup ki jingïakob shut jabieng, ki jingïakob taiñia, ki jingthoh esse bad ki prokram kiba ïadei bad ka kolshor hapdeng u snem 2020 bad 2025.
Nalor ka kamram kum u nonghikai, u Dr. Bang u la noh synniang sha ka roi ka par ha ka imlang sahlang, u la trei kum u dkhot jong ka Juvenile Justice Board, Khliehriat, kum u dkhot jong ka Red Cross Society ha u snem 2015-2016 bad kum u nonghikai ha Thomas Jones Synod College, Jowai, hapdeng u snem 2014 bad 2017.
U la wanrah ruh ïa ki rukom hikai kiba thymmai, kynthup ïa ka rukom hikai bapher kaba pynshlur ïa ki khynnah pule ban long ki nongpule ba laitluid bad kyntiew ïa ka jingïadei kaba kham ha ka kamra pule lyngba ki jingïakren ban pynbeit ïa ki jingeh.
Haba pynpaw ka jingsngewnguh, u Dr. Bang u la ong, “kane ka khusnam ka dei ka jingithuh ïa ka jingtreilang jong ka ïing ka sem jong nga, ki paralok ba ïatreilang bad nga, bad ki tnad pule puthi jong ka distrik bad ka jylla. Nga sngewnguh shibun eh ïa U Blei Uba la ïalam ïanga ban jied ïa ka kam hikai kum ka kam bad ban shakri ïa ka imlang sahlang ha la ka jong ka rukom kaba rit.”
U la ai jingmut ban pynkhlaiñ ïa ka rukom hikai. U la kyrpad ban ai jingkyrshan pisa ïa ki skul shimet kiba noh synniang shibun sha ka pule puthi, khamtam ha ka dur jong ki grant-in-aid na ka bynta ban kyntiew ïa ki jingdon jingem bad ka tulop jong ki nonghikai.
U la ban jur ruh halor ka jingdonkam ban pyntreikam pura ïa ka National Education Policy (NEP), ban kynthup ïa ka ktien Khasi ha ka Khyrnit Baphra jong ka Riti Synshar bad ban pynkhlaiñ ka jingkyrshan ïa ki khynnah ba donkam kyrpang lyngba ki lad jingïarap kiba biang.
U la kyntu ïa ki sienjam kiba khlaiñ na baroh ki liang ban pynthikna ba ka jingpule kaba bha kan long kaba lah ban ïoh ha ki jaka nongkyndong bad kiba kham duna ka ïoh ka kot ha ka imlang sahlang.
