Shillong, Jylliew 14: Haduh 1681 ngut na ki 3869 ngut kiba ïakhun ïa ka National Eligibility cum Entrance Test – NEET (UG) 2025 na ka jylla Meghalaya ki la pas ha ka jingpynbna result da ka National Testing Agency (NTA) ha ka sngi Saitjaiñ.
Ki la don kumba 4068 ngut ki kyrtong kiba ïakhun na Meghalaya ki la thep kyrteng na ka bynta ban ïakhun ïa ka eksam entrance test ha kaba na ki 3869 ngut kiba la ïakhun ïa ka eksam, kumba 1681 ki la long kiba la tbit bad kiba la pass ïa ka NEET (UG) 2025, ong ka NTA ha ka kyrwoh khubor.
Ha u snem 2024, kumba 4009 ngut ki kyrtong kiba ïakhun ki la thep kyrteng ha kaba 3815 ki la leit ban ïakhun ïa ka eksam bad kumba 1849 ngut ki la pass ïa ka NEET (UG) 2024, ïathuh ka kyrwoh khubor.
Ka NTA ka la pynlong ïa ka national eligibility cum entrance test (UG) – 2025 na ka bynta palat 22 lak ngut ki kyrtong kiba ïakhun ha ki 5468 tylli ki centre bapher bapher ha ki 552 tylli ki nongbah ha kylleng jong ka ri bad kumba 14 tylli ki nongbah shabar jong ka ri India ki la pynlong ïa ka eksam ha ka 4 tarik u Jymmang, 2025.
Ïa kane ka eksam la pynlong ha ki 13 tylli ki jait kyntien kiba kynthup ha ka ktien Assamese, Bengali, English, Gujarati, Hindi, Kannada, Malayalam, Marathi, Odia, Punjabi, Tamil, Telugu bad Urdu.
Kine ki 14 tylli ki nongbah ba la pynlong ïa ki eksam shabar jong ka ri India ki dei ha Abu Dhabi, Dubai, Bangkok, Colombo, Doha, Kathmandu, Kuala Lumpur, Kuwait City, Lagos, Manama, Muscat, Riyadh, Sharjah bad Singapore.
