Shillong, K’lyngkot, 08: Tang shu poi ka aiom tlang, ki nongdie soh na ka thaiñ Mylliem ki ju wan hiar sha nongbah Shillong ban shong die soh harud surok Lum Jingshai, Jail Road bad naduh ba la shna pynbha ïa ka surok VIP Road kaba pynïasoh naduh lad Mawroh ter ter shaduh ka shnong Umshing Umjapung bad ka shnong Mawkynroh-Umshing.
Ki nongdie soh ki la wan kamai jakpoh ban die ïa u sohñiamtra sha ki nongleit nongwan trai shnong kiba ju ïaid lyngba ka surok bad sha ki nongjngohkai pyrthei kiba ju ïaid lyngba na ka surok VIP Road kaba pynïasoh shaduh ka surokbah Mawïongrim.
Ka Kong Balarisuk Kharmawphlang ka la ïathuh ba u soh uba la die mynta u dei uba ki ïoh na ka shnong Narwan, East Jaiñtia Hills District bad na South West Khasi Hills District kata na ka shnong Ngunraw, Nongnah bad na ka shnong Mawphu, East Khasi Hills District katba u soh ñiamtra uba mih na ka shnong Nongjrong ki ju die haduh ynda la mih u bnai Rymphang.
Kumba lah ban sakhi, ki don da ki phew ngut ki nongdie sohñiamtra kiba shong die soh naduh ka por 9 baje mynstep haduh 5 baje janmiet naduh surok ka shnong Mawroh ter ter shaduh shajan ka Sanker bad sharum ka surok shnong Umshing Umjapung.
