Mawkyrwat, Jylliew, 03: Hapdeng ka jingtrei shitom ba khlem shongthait jong ka bor shnong Lawblei kaba ban wad ïa ka met jong u Bah Sainkupar Lyngkhoi wat hapdeng ka jingther jong u slap bad ka jingpaswut jong ka lyer ha ka sngi Baar la lap ïa ka met jong u kaba la pyut na kawei ka jaka ba la khot ka Sdad Keiblang ha wah Umngi.
Katkum ka tyllong khubor ba la ïohlum la ong ba ka jingwad ïa ka met jong u Bah Saiñkupar ka la kynjoh sha ka 9 sngi bad ïa ka met la lap ha Sdad Keiblang, Wah Umngi kaba jngai kumba 4 kilomitar eiei na ka jaka ba u la ngam jyllop.
Namar ka jingjur slap ka um ka la rong sha jngai na ka jaka ba u ngam jyllop.
La lap ïa ka met jong u Bah Sainkupar ha ka por kumba 3 baje da ki nongshong shnong ka shnong Lawblei ryngkat ki bahaiing jong u kiba leit wad ïa u khlem shongthait.
